ഒടുവിൽ മാസ്ക് ധരിച്ച് ഡൊണാൾഡ് ട്രംപ്; മഹാമാരി പൊട്ടിപ്പുറപ്പെട്ടതിന് ശേഷം ആദ്യമായി

മാസ്ക് ധരിച്ച പൊതു ഇടത്തിൽ പ്രത്യക്ഷപ്പെട്ട് യുഎസ് പ്രസിഡന്റ് ഡൊണാൾഡ് ട്രംപ്. ഇതാദ്യമായാണ് യുഎസ് പ്രസി‍ഡന്റിനെ മാസ്ക് ധരിച്ച് പൊതുവേദിയിൽ കാണുന്നത്.

ശനിയാഴ്ച്ച വാൾട്ടർ റീഡ് നാഷണൽ മിലിട്ടറി മെഡിക്കൽ സെന്ററിൽ സന്ദർശനത്തിനെത്തിയതായിരുന്നു ട്രംപ്. 'ആശുപത്രി സന്ദർശനത്തിനിടെ മാസ്ക് ധരിക്കുന്നത് വളരെ നല്ല കാര്യമാണ്' എന്നായിരുന്നു ട്രംപിന്റെ പ്രതികരണം.

കോവിഡിനെ പ്രതിരോധിക്കാൻ മാസ്ക് ധരിക്കണമെന്ന് ആരോഗ്യ വിദഗ്ധർ ആവർത്തിച്ച് നിർദേശിച്ചെങ്കിലും ട്രംപ് അതിന് തയ്യാറായിരുന്നില്ല. ഇതനിടയിലാണ് ആശുപത്രി സന്ദർശനത്തിന് മാസ്ക് ധരിച്ച് യുഎസ് പ്രസിഡ‍ന്റ് എത്തിയത്.

പൊതുചടങ്ങുകളിലടക്കം മാസ്ക് ധരിക്കാതെയായിരുന്നു ട്രംപ് എത്തിയിരുന്നത്. ഇത് നിരവധി തവണ വിമർശിക്കപ്പെടുകയും ചെയ്തിരുന്നു.

മാസ്ക് ധരിച്ചാൽ താൻ ദുർബലനാണെന്ന പ്രതീതിയുണ്ടാകുമെന്ന് പ്രസിഡന്‍റ് ഭയക്കുന്നുവെന്ന് അദ്ദേഹത്തോട് അടുത്ത ചില ആളുകളെ ഉദ്ധരിച്ച് റിപ്പോർട്ടുകളുണ്ടായിരുന്നു.

യുഎസിൽ 3.2 ദശലക്ഷം പേർക്കാണ് ഇതുവരെ കോവിഡ്-19 ബാധിച്ചത്. ഒരു ലക്ഷത്തി മുപ്പത്തിനാലായിരത്തോളം പേർ മരിക്കുകയും ചെയ്തു.

അതേസമയം, 24 മണിക്കൂറിൽ രണ്ടുലക്ഷത്തി മുപ്പതിനായിരത്തിലധികം പേർക്ക് രോഗം ബാധിച്ചതായി ലോകാരോഗ്യ സംഘടന വ്യക്തമാക്കി. ലോകത്ത് കോവിഡ് ബാധിതരുടെ 1 കോടി 30 ലക്ഷവും മരിച്ചവരുടെ എണ്ണം 5.71 ലക്ഷം കടന്നു.

സ്ഥിതി മാറ്റമില്ലാതെ തുടരുന്ന അമേരിക്കയിൽ ഫ്ലോറിഡയിൽ മാത്രം ഇന്നലെ പതിനയ്യാരയിരത്തലധികം കേസുകൾ റിപ്പോർട്ട് ചെയ്തത് ആശങ്ക വർധിപ്പിക്കുന്നു.

രണ്ടാംഘട്ട വൈറസ് വ്യാപനം അതിരൂക്ഷ ഘട്ടത്തിലേക്ക് നീങ്ങുന്ന സാഹചര്യത്തിൽ ദക്ഷിണാഫ്രിക്ക ദേശീയ അടിയന്തരാവസ്ഥ പ്രഖ്യാപിച്ചു.

ഇന്നലെ 500 ൽ അധികം പേർ കൂടി മരിച്ചതോടെ മരണസംഖ്യയിൽ മെക്സികോ ഇറ്റലിയെ മറികടന്നു.