തൃശൂരിൽ വളർത്തുനായയെ വിളിക്കാനിറങ്ങിയ യുവതിയെ അയൽവാസി കുത്തിക്കൊന്നു; കിണറ്റിൽ ഒളിച്ചിരുന്ന പ്രതി പിടിയിൽ

ഇന്നലെ വൈകിട്ട് 6.30-ഓടെയായിരുന്നു സംഭവം. വീട്ടിലെ വളർത്തുനായ റോഡിലേക്കിറങ്ങിയപ്പോൾ അതിനെ തിരികെ വിളിക്കാൻ ഇറങ്ങിയതായിരുന്നു സൗമ്യ. ഈ സമയം കത്തിയുമായി പിന്നാലെയെത്തിയ തോമസ് സൗമ്യയെ കുത്തിവീഴ്ത്തുകയായിരുന്നു. കുത്തേറ്റ് അരമണിക്കൂറോളം റോഡിൽ രക്തം വാർന്നു കിടന്ന സൗമ്യയെ പിന്നീട് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

കൊലപാതകത്തിന് ശേഷം സമീപത്തെ വീട്ടിലെ കിണറ്റിൽ ഇറങ്ങി ഒളിച്ച പ്രതിയെ അഗ്നിരക്ഷാസേനയുടെ സഹായത്തോടെയാണ് പൊലീസ് പുറത്തെത്തിച്ചത്. അഞ്ചേരിയിൽ ഓട്ടോ ഡ്രൈവറായ തോമസും സൗമ്യയുടെ കുടുംബവും തമ്മിലുള്ള വ്യക്തിവൈരാഗ്യമാണ് കൊലപാതകത്തിന് കാരണമെന്ന് കരുതുന്നു. ആശുപത്രിയിൽ പ്രവേശിപ്പിച്ച പ്രതി ഇപ്പോൾ പൊലീസ് നിരീക്ഷണത്തിലാണ്. ഇന്ന് അറസ്റ്റ് രേഖപ്പെടുത്തും. സൗമ്യയുടെ സംസ്കാരം ഇന്ന് നടക്കും. ഏഗ്ന, ആരോൺ എന്നിവർ മക്കളാണ്.

advertisement