ഒറ്റപ്പാലത്ത് വീടുവീടാന്തരം ആചാരബദ്ധമായ ആലാപനവുമായി ജീവിക്കുന്നവരുടെ കഥ ‘തിരുവരംഗർ - ദി ഡെയ്റ്റി സിംഗേഴ്സ്’ പ്രദർശനത്തിന്

സംഗീതത്തെ മുഖ്യ ആഖ്യാനമാക്കി അവതരിപ്പിക്കുന്ന ഈ മ്യൂസിക്കൽ ഡോക്യുമെന്ററിയിൽ, സംഭാഷണങ്ങളേക്കാൾ പ്രാധാന്യം ശബ്ദത്തിനും താളത്തിനും പാട്ടിനുമാണ്. വാചിക ജനകീയ സംഗീതപാരമ്പര്യത്തിൽ ആഴമായി പതിഞ്ഞിരിക്കുന്ന ഈ അപദാനങ്ങൾ ആത്മീയ ആഹ്വാനങ്ങളായും സാമൂഹിക രേഖകളായും പ്രവർത്തിക്കുന്നു—വിശ്വാസം, തൊഴിൽ, ജാതി, ദിനചര്യ എന്നിവയെ തമ്മിൽ ബന്ധിപ്പിച്ച്, തെരുവുകളിലൂടെയും വീടുകളുടെ അകത്തള അതിരുകളിലൂടെയും ഗായകർ സഞ്ചരിക്കുമ്പോൾ, ഈ പാരമ്പര്യാചാരത്തോട് പ്രാദേശിക സമൂഹം എങ്ങനെ പ്രതികരിക്കുന്നു എന്നതും, സമകാലിക കേരള സമൂഹം ഇത്തരം സാംസ്‌കാരിക ആചാരങ്ങളെ എങ്ങനെ കാണുന്നു, സംരക്ഷിക്കുന്നു, അല്ലെങ്കിൽ അകലം പാലിക്കുന്നു എന്നതും ചിത്രം നിരീക്ഷിക്കുന്നു.

advertisement

2025-ലെ കൊഹിനൂർ ഫിലിം ഫെസ്റ്റിവലിൽ (മുംബൈ) മികച്ച ഡോക്യുമെന്ററിയായി വിജയിച്ച ഈ ചിത്രം, 28-മത് സോഷ്യൽ ജസ്റ്റിസ് ഫിലിം ഫെസ്റ്റിവൽ (ചെന്നൈ), ഇൻഡിപെൻഡന്റ് ആൻഡ് എക്സ്പെരിമെന്റൽ ഷോർട്ട് ഫിലിം ഫെസ്റ്റിവൽ ഓഫ് കേരള (കോഴിക്കോട്), നാനോകോൺ ഇന്റർനാഷണൽ ഫിലിം ഫെസ്റ്റിവൽ (അമേരിക്ക), പ്ലാനറ്റ്.ഡോക് അന്താരാഷ്ട്ര സാമൂഹ്യ-പരിസ്ഥിതി ചലച്ചിത്രമേള (ബ്രസീൽ), ഇന്റർനാഷണൽ ഫോക്‌ലോർ ഫിലിം ഫെസ്റ്റിവൽ (തൃശൂർ), പാഞ്ചജന്യം അന്താരാഷ്ട്ര ചലച്ചിത്രമേള (ചിറ്റൂർ, പാലക്കാട്) എന്നിവയുൾപ്പെടെ നിരവധി ദേശീയ-അന്താരാഷ്ട്ര മേളകളിൽ തെരഞ്ഞെടുക്കപ്പെട്ടിട്ടുണ്ട്. കൂടാതെ തുഞ്ചത്തെഴുത്തച്ഛൻ മലയാളം യൂണിവേഴ്സിറ്റി (തിരൂർ, മലപ്പുറം) സംഘടിപ്പിച്ച ദൃശ്യം അന്താരാഷ്ട്ര ഡോക്യുമെന്ററി ഫിലിം ഫെസ്റ്റിവൽ മത്സരവിഭാഗത്തിലും ‘തിരുവരംഗർ - ദി ഡെയ്റ്റി സിംഗേഴ്സ്’ തിരഞ്ഞെടുത്തിരുന്നു.

അനുന കൺസൾട്ടിങ്ങിന്റെ ബാന്നറിൽ ഈ ഡോക്യൂമെന്ററി നിർമിച്ചിരിക്കുന്നത് സനോജ് ഗോപാലകൃഷ്ണനും പ്രിയ കാർത്തികേയനും ചേർന്നാണ്. ക്യാമറ- ജയൻ ദാസ്, സൗണ്ട്- ഷാജി മാധവൻ, എഡിറ്റ്- ശ്രീജിത്ത് കൃഷ്ണ, പ്രശാന്ത്, അസിസ്റ്റന്റ് ഡയറക്ടർ- രാജേഷ് ബി.

തെന്മലയിൽ നടക്കുന്ന തെന്മല റൂറൽ ഇക്കോളജി നേച്ചർ അന്താരാഷ്ട്ര ഡോക്യുമെന്ററി & ഷോർട്ട്ഫിലിം ഫെസ്റ്റിവലിൽ പ്രദർശിപ്പിക്കും. ഫെബ്രുവരി 28-ന് വൈകുന്നേരം 7:30-ന് തെന്മല ഇക്കോ ടൂറിസം ക്യാംപസിലെ ആംഫി തീയേറ്ററിൽ ആണ് പ്രദർശനം. ഫെബ്രുവരി 26, 27, 28 തീയതികളിലായി നടക്കുന്ന ഈ അന്താരാഷ്ട്ര ചലച്ചിത്രോത്സവം ഇന്ത്യയിലെ ആദ്യത്തെ ഇക്കോ ടൂറിസം കേന്ദ്രമായ തെന്മലയിൽ ചലച്ചിത്രവും പ്രകൃതിയും കഥകളും ഒരുമിക്കുന്ന സാംസ്‌കാരിക വേദിയാണ്.