മുന്‍ അറ്റോണി ജനറല്‍ സോളി സൊറാബ്​ജി അന്തരിച്ചു; പാവപ്പെട്ടവരെ സഹായിക്കാൻ മുന്നിൽനിന്ന വ്യക്തിത്വമെന്ന് പ്രധാനമന്ത്രി

advertisement

91 വയസുള്ള സൊറാബ്ജിയ്ക്കു സുപ്രീം കോടതി ആദരാഞ്ജലി അർപ്പിച്ചു. ചീഫ് ജസ്റ്റിസ് എൻ വി രമണ, ജസ്റ്റിസുമാരായ സൂര്യ കാന്ത്, എ എസ് ബോപണ്ണ എന്നിവരടങ്ങിയ ബെഞ്ച്, ഇന്നത്തെ കോടതി നടപടികൾ ആരംഭിക്കുന്നതിന് തൊട്ടുമുമ്പ്, “മനുഷ്യാവകാശങ്ങൾക്കു വേണ്ടി പോരാടുന്നവരെ സംബന്ധിച്ച് വളരെ ദുഃഖകരമായ വാർത്തയാണ് സോളിയുടെ നിര്യാണമെന്നും സൌമ്യമായ ആത്മാവിനായി ഞങ്ങൾ പ്രാർത്ഥിക്കുന്നു ” എന്നും വ്യക്തമാക്കി.

കോവിഡ്​ ബാധിതനായി ചികിത്സയിലായിരുന്ന പ്രമുഖ അഭിഭാഷകനും മുന്‍ അറ്റോണി ജനറലും പദ്​മ വിഭൂഷണ്‍ ജേതാവുമായ സോളി ജഹാംഗീര്‍ സൊറാബ്​ജി ഇന്നു രാവിലെയാണ് അന്തരിച്ചത്. ഡല്‍ഹിയിലെ സ്വകാര്യ ആശുപത്രിയില്‍ ചികിത്സയിലായിരുന്ന അദ്ദേഹത്തിന് 91 വയസ്സായിരുന്നു.

1930ല്‍ മുംബൈയില്‍ ജനിച്ച്‌​ 1953ല്‍ ബോംബൈ ഹൈക്കോടതിയില്‍ അഭിഭാഷകനായി പ്രാക്​ടീസ്​ തുടങ്ങിയ അദ്ദേഹം 1971ല്‍ സുപ്രീം കോടതി സീനിയര്‍ കൗണ്‍സലായി. 1989- 90 വര്‍ഷങ്ങളിലും പിന്നീട്​ എന്‍.ഡി.എ ഭരണത്തില്‍ 1998-2004 ലും അറ്റോണി ജനറലായി. 1997ല്‍ യു.എന്‍ പ്രതിനിധിയായി നൈജീരിയയിലും സേവനം അനുഷ്​ഠിച്ചു. യു.എന്‍ മനുഷ്യാവകാശ സബ്​ കമീഷനിലും ന്യൂനപക്ഷ സംരക്ഷണ സബ്​ കമീഷനിലും ഹേഗ്​ ആസ്​ഥാനമായുള്ള യു.എന്‍ ലോക കോടതിയിലും സേവനം അനുഷ്​ഠിച്ചു. ഏഴു പതിറ്റാണ്ട്​ രാജ്യത്ത്​ നിയമ വൃത്തങ്ങളില്‍ നിറ സാന്നിധ്യമായിരുന്നു. 2002ല്‍ ഇന്ത്യന്‍ ഭരണഘടന പുനര്‍രചന കമീഷനിലും അംഗമായി.

പത്ര സ്വാതന്ത്ര്യം, പ്രധാനമന്ത്രിമാരുടെയും ഗവര്‍ണര്‍മാരുടെയും അമിതാധികാരം, സംസ്​ഥാനങ്ങളിലെ പൊലീസ്​ സേനയുടെ സര്‍വാധിപത്യം തുടങ്ങിയ വിഷയങ്ങളില്‍ നിര്‍ണായക വിധികള്‍ക്ക്​ പിന്നില്‍ പ്രവര്‍ത്തിച്ചിട്ടുണ്ട്​. നിയമവും പൊതുരംഗവുമായി ബന്ധപ്പെട്ട നിരവധി മാസ്​റ്റര്‍ പീസുകളുടെ കര്‍ത്താവാണ്​.