എന്താ ഈ കൊച്ചുകേരളത്തിൽ സംഭവിക്കുന്നത്? നേതാക്കളുടെ വാർഡിൽ സ്വന്തം പാർട്ടി പൊട്ടി

തദ്ദേശ തിരഞ്ഞെടുപ്പ് ഫലം പല പ്രമുഖരെയും ഞെട്ടിച്ചു. കുടുബത്തോടൊപ്പം വന്നു വോട്ട് ചെയ്ത് പല നേതാക്കളുടെ സ്വന്തം വാർഡിൽ എതിർ പാർട്ടിയിലെ സ്ഥാനാർത്ഥിയാണ് വിജയിച്ചത്.

ജോസ് കെ മാണി- കേരള കോൺഗ്രസ് എം ചെയർമാൻ ജോസ് കെ മാണിയുടെ വാർഡിൽ യുഡിഎഫിന് വിജയം. പാലാ നഗരസഭ 22 -ാം വാര്‍ഡില്‍ യുഡിഎഫ് സ്ഥാനാർത്ഥി രജിത പ്രകാശാണ് വിജയിച്ചത്. രജിത 287 വോട്ടും കേരളാ കോണ്‍ഗ്രസ് സ്ഥാനാർത്ഥിക്ക് 232 വോട്ടും ലഭിച്ചു. ജോസ് കെ മാണിയും മകനും നേരിട്ട് പ്രചാരണം നടത്തിയ വാര്‍ഡുകൂടിയാണിത്.

advertisement

മാണി സി കാപ്പൻ- പാലാ എംഎൽഎ മാണി സി കാപ്പന്റെ സ്വന്തം വാര്‍ഡില്‍ കേരള കോണ്‍ഗ്രസ് എം സ്ഥാനാര്‍ഥി ജയിച്ചു. എല്‍ഡിഎഫ് സ്ഥാനാര്‍ഥി ബൈജു കൊല്ലം പറമ്പിലാണ് ഇവിടെ വിജയിച്ചത്.

വെള്ളാപ്പള്ളി നടേശൻ- വെള്ളാപ്പള്ളി നടേശന്റെ വാർഡായ മാരാരിക്കുളം വടക്ക് പഞ്ചായത്ത് അഞ്ചാം വാർഡിൽ യുഡിഎഫ് വിജയിച്ചു. യുഡിഎഫ് സ്ഥാനാർത്ഥി ഷൈലജയാണ് വിജയിച്ചത്. ഇവിടെ നേരത്തെ പ്രഖ്യാപിച്ച സിപിഎം സ്ഥാനാർത്ഥിയെ മാറ്റി എസ്എൻഡിപി നിർദേശിച്ച സ്ഥാനാർഥിയെ ആണ് എൽഡിഎഫ് മത്സരിപ്പിച്ചത്.

വി ഡി സതീശൻ- പ്രതിപക്ഷ നേതാവ് വി ഡി സതീശന്റെ വാർഡിൽ ജയിച്ചത് ബിജെപി സ്ഥാനാർത്ഥി. എറണാകുളം പറവൂര്‍ നഗരസഭ 21-ാം വാര്‍ഡിൽ ബിജെപിയുടെ ആശാ മുരളിയാണ് വിജയിച്ചത്. ബിജെപിയുടെ സിറ്റിങ് വാർഡാണ്.

രാഹുല്‍ മാങ്കൂട്ടത്തിൽ- രാഹുൽ മാങ്കൂട്ടത്തിലിന്‍റെ വാർഡിലും യുഡിഎഫിന് സീറ്റ് നഷ്ടമായി. എൽഡിഎഫാണ് വിജയിച്ചത്. പള്ളിക്കൽ 18-ാം വാർഡിൽ കാവ്യ വേണുവാണ് വിജയിച്ചത്. 52 വോട്ടുകൾക്കാണ് വിജയം.

കെ സുരേന്ദ്രൻ- ബിജെപി മുൻ സംസ്ഥാന അധ്യക്ഷൻ കെ സുരേന്ദ്രന്റെ വാർഡിൽ ബിജെപിക്ക് തോൽവി. കോഴിക്കോട് അത്തോളി ​ഗ്രാമ പഞ്ചായത്ത് ഒന്നാം വാർഡായ മൊടക്കല്ലൂർ സിപിഎമ്മിന്റെ ​ഗീത മപ്പുറത്ത് ബിജെപിയുടെ എരഞ്ഞോളി ശ്യാമളയെ 173 വോട്ടിന് തോൽപ്പിച്ച് തിരികെ പിടിച്ചു

കെ സി വേണുഗോപാൽ- കെ സി വേണുഗോപാലിന്റെ വാർഡിൽ എൽ ഡി എഫിന് വിജയം. ആലപ്പുഴ കോർപ്പറേഷൻ കൈതവന വാർഡിലാണ് യു ഡി എഫ് തോറ്റത്. സിപിഎം സ്ഥാനാർത്ഥി സൗമ്യരാജാണ് വിജയിച്ചത്.

ഷാഫി പറമ്പിൽ-കെപിസിസി വൈസ് പ്രസിണ്ടന്റ് ഷാഫി പറമ്പിൽ എം പിയുടെ വീട് സ്ഥിതി ചെയ്യുന്ന വാർഡിൽ എസ്ഡിപിഐക്ക് വിജയം. ഷാഫിയുടെ പാലക്കാട്ടെ വീടുള്ള ഓങ്ങല്ലൂർ പഞ്ചായത്ത് 13-ാം വാർഡ് പഴഞ്ചേരി വാർഡിലാണ് എസ്ഡിപിഐയുടെ അനില അശോകൻ മുസ്ലീം ലീഗ് സ്ഥാനാർഥിയെ 248 വോട്ടിന് തോൽപ്പിച്ചത്.

ശ്രേയാംസ് കുമാർ-  ആർ ജെഡി നേതാവ് ശ്രേയാംസ്കുമാറിന്റെ കൽപ്പറ്റ നഗരസഭയിലെ പുളിയാർമല വാർഡിൽ ബിജെപി സ്ഥാനാർത്ഥി ജയിച്ചു.

പി എം ആർഷോ-എസ്എഫ്‌ഐ മുൻ സംസ്ഥാന സെക്രട്ടറി പി എം ആർഷോയുടെ വാർഡിൽ കോൺഗ്രസ് വിജയിച്ചു. പാലക്കാട് തച്ചമ്പാറ ആറാം വാർഡായ പിച്ചളമുണ്ടയിൽ 64 വോട്ടിനാണ് കോൺഗ്രസ് സ്ഥാനാർത്ഥി അഭിലാഷ് സിപിഎം സ്ഥാനാർത്ഥി വിഷ്ണുവിനെ പരാജയപ്പെടുത്തിയത്.