വോട്ട് ചെയ്യാൻ പഠിക്കാം; കൊല്ലം കളക്ടറേറ്റിൽ ഇ വി എം സഹായകേന്ദ്രം തുറന്നു

പൊതുജനങ്ങൾക്ക് ഇ വി എം യന്ത്രത്തിൻ്റെ പ്രവർത്തനം നേരിൽ കണ്ടറിയാനും വോട്ട് രേഖപ്പെടുത്തുന്ന രീതിയെക്കുറിച്ച് വ്യക്തമായ ധാരണ നേടാനും സഹായകേന്ദ്രം വഴിയൊരുക്കുന്നു. ഇതിനായി പ്രത്യേകമായി പരിശീലനം ലഭിച്ച ഉദ്യോഗസ്ഥരെ നിയമിച്ചിട്ടുണ്ട്. സഹായകേന്ദ്രത്തിൽ ബാലറ്റ് യൂണിറ്റ്, കൺട്രോൾ യൂണിറ്റ്, വി.വി.പാറ്റ് (വോട്ടർ വെരിഫൈഡ് പേപ്പർ ഓഡിറ്റ് ട്രെയിൽ) എന്നിവ സജ്ജീകരിച്ചിട്ടുണ്ട്. കൺട്രോൾ യൂണിറ്റിലെ ബട്ടൺ അമർത്തുമ്പോൾ യന്ത്രം വോട്ടിംഗ് പ്രവർത്തനത്തിനായി സജ്ജമാകും. തുടർന്ന് ബാലറ്റ് യൂണിറ്റിലെ സ്ഥാനാർത്ഥികളുടെ ചിഹ്നങ്ങൾക്കരികിലുള്ള ബട്ടൺ അമർത്തിയാണ് വോട്ട് രേഖപ്പെടുത്തുന്നത്. രേഖപ്പെടുത്തിയ വോട്ട് വി.വി.പാറ്റിൽ ദൃശ്യമാകുന്നതിലൂടെ വോട്ടിംഗ് പ്രക്രിയയുടെ സുതാര്യതയും വിശ്വാസ്യതയും പൊതുജനങ്ങൾക്ക് വ്യക്തമാക്കുന്നു. സഹായകേന്ദ്രം പ്രവൃത്തിദിനങ്ങളിൽ രാവിലെ 10 മുതൽ വൈകിട്ട് 5 വരെ പ്രവർത്തിക്കും. ഉദ്ഘാടന ചടങ്ങിൽ തിരഞ്ഞെടുപ്പ് ഡെപ്യൂട്ടി കളക്ടർ ബി. ജയശ്രീ, ജൂനിയർ സൂപ്രണ്ട് സുരേഷ്, തിരഞ്ഞെടുപ്പ് വിഭാഗത്തിലെ ഉദ്യോഗസ്ഥർ തുടങ്ങിയവർ പങ്കെടുത്തു.

advertisement