ഒരു വ്യക്തിയെ ആരോഗ്യത്തോടെ നിലനിർത്താൻ 10 മിനിറ്റ് വ്യായാമം മതിയാകുമോ എന്ന സംശയം ഉണ്ടായേക്കാം എന്നാൽ ഒരു വ്യക്തി വ്യായാമം ശീലമാക്കാത്ത വ്യക്തിയാണെങ്കിൽ അയാൾ നിത്യേന പത്തു മിനിറ്റെങ്കിലും വ്യായാമം ചെയ്യുന്നത് ശരീരത്തിന് ഗുണം ചെയ്യും. മാത്രമല്ല, 40 നും 85 നും ഇടയിൽ പ്രായമുള്ള മുതിർന്നവർ ശാരീരിക പ്രവർത്തനങ്ങളിൽ ഏർപ്പെടുന്ന സമയം വർധിപ്പിച്ചാൽ പ്രതിവർഷം 1,10,000 മരണങ്ങൾ തടയാൻ കഴിയുമെന്ന് സമീപകാല പഠന റിപ്പോർട്ടുകൾ സൂചിപ്പിക്കുന്നു. നിത്യേന പത്തു മിനിറ്റ് വരുന്ന മൈക്രോ വർക്കൗട്ടുകൾ ശാരീരികമായി മാത്രമല്ല മാനസികമായ ഉന്മേഷവും നൽകും.
advertisement
ഒരു വ്യക്തി പത്തുമിനിറ്റ് എങ്കിലും വ്യായാമം ചെയ്യണം എന്ന് പറയുന്നതിന്റെ കാരണങ്ങൾ ഇതാ
മാനസിക സമ്മർദ്ദം കുറയ്ക്കും
വ്യായാമം ചെയ്യുന്നതിലൂടെ നിങ്ങളുടെ മനസിനെ ശാന്തമാക്കാൻ നിങ്ങൾക്ക് സാധിക്കും എന്ന വിദഗ്ധർ അവകാശപ്പെടുന്നു. സ്ഥിരമായി വ്യായാമം ചെയ്യുന്നത് നിങ്ങളെ മാനസികമായി ഉന്മേഷവാനാക്കുകയും കൂടുതൽ സന്തോഷം നൽകുകയും ചെയ്യും.
കാർഡിയോവാസ്കുലർ ഫിറ്റ്നസ് മെച്ചപ്പെടുത്തും
ദിവസവും 10 മിനിറ്റ് മൈക്രോ വർക്ക്ഔട്ട് ചെയ്യുന്നതിലൂടെ ശരീരത്തിലെ ഓക്സിജന്റെ അളവ് വർധിപ്പിക്കാൻ സാധിക്കും. ഇത് ഹൃദയത്തിന്റെ ആരോഗ്യനില വർധിപ്പിക്കുന്നു. ഓക്സിജൻ ലഭിക്കുന്നത് മാത്രമല്ല പതിവ് വ്യായാമം കൂടുതൽ രക്തചംക്രമണത്തിനും കാരണമാകുന്നു.
ചർമ്മത്തിന്റെ ആരോഗ്യം നിലനിർത്താം
ഓക്സിഡേറ്റീവ് സ്ട്രെസ് ചർമ്മത്തിന്റെ ആരോഗ്യത്തെ ബാധിക്കുന്നു. പതിവ് മൈക്രോ വർക്കൗട്ടുകൾ ചെയ്യുന്നതിലൂടെ ശരീരത്തിന്റെ സ്വാഭാവിക ആന്റിഓക്‌സിഡന്റുകളുടെ ഉത്പാദനം വർദ്ധിപ്പിക്കാൻ കഴിയുന്നു. ഇത് മികച്ചതും ആരോഗ്യകരവുമായ ചർമ്മം ഉണ്ടാകാൻ കാരണമാകുന്നു.
ബുദ്ധിശക്തി വർദ്ധിപ്പിക്കാം
പതിവായി ചെയ്യുന്ന മിതമായ വ്യായാമങ്ങൾ ഹൃദയത്തിൽ നിന്നും ശരീരത്തിന്റെ എല്ലാ ഭാഗത്തേക്കുമുള്ള രക്തയോട്ടം വർധിപ്പിക്കുന്നു. ഇതിലൂടെ മസ്തിഷ്കത്തിലേക്ക് ആവശ്യമായ അളവിൽ ഓക്സിജൻ ലഭിക്കാൻ കാരണമാകുന്നു.
രക്തത്തിലെ പഞ്ചസാരയുടെ അളവ് നിയന്ത്രിക്കാം
പതിവ് വ്യായാമം പ്രമേഹത്തിനും പ്രീ ഡയബറ്റിസിനും ഉള്ള സാധ്യത കുറയ്ക്കുമെന്ന് നിരവധി ഗവേഷണങ്ങൾ തെളിയിച്ചിട്ടുണ്ട്. നിത്യേന വ്യായാമം ചെയ്യുന്നതിലൂടെ രക്തത്തിലെ പഞ്ചസാരയുടെ അളവ് നിയന്ത്രിക്കാം.
ശരീരഭാരം കുറയ്ക്കാം
ശരീരഭാരം കുറയ്ക്കുക എന്ന ലക്ഷ്യത്തോടെയാണ് പലരും ആദ്യം തന്നെ വ്യായാമം ചെയ്യാൻ തുടങ്ങുന്നത്. ശരീരഭാരം കുറയ്ക്കുക മാത്രമല്ല വ്യായാമത്തിന്റെ പ്രയോജനം. എന്നാൽ, സ്ഥിരമായ വ്യായാമത്തിലൂടെ ഒരു വ്യക്തിക്ക് ശരീരഭാരം കുറയ്ക്കാൻ കഴിയും.