സൈനസിന്റെ ലക്ഷണങ്ങൾ
- മൂക്കടപ്പ് അല്ലെങ്കിൽ മൂക്കിൽ നിന്ന് പച്ചയോ മഞ്ഞയോ കലർന്ന കഫം വന്നേക്കാം.
- കടുത്ത തലവേദന: നെറ്റിക്ക് മുകളിൽ തലവേദന അനുഭവപ്പെടുകയാണെങ്കിൽ അത് സൈനസ് തലവേദന ആയിരിക്കും. സൈനസ് ബാധിച്ച ഒരാൾ കുനിയുമ്പോൾ കഫം മുന്നോട്ട് നീങ്ങുകയും നെറ്റിയുടെ ഭാഗത്ത് വേദന ഉണ്ടാക്കുകയും ചെയ്യും.
- കടുത്ത പനി
- സ്ഥിരമായ ചുമ: രാത്രിയിൽ പതിവായി ചുമയ്ക്കുന്നുണ്ടെങ്കിൽ അത് സൈനസിന്റെ മറ്റൊരു ലക്ഷണമാണ്. രാത്രിയിൽ കിടക്കുമ്പോൾ കഫം തൊണ്ടയുടെ പിൻഭാഗത്തേക്ക് നീങ്ങുന്നത് എളുപ്പമാകുകയും ചുമയ്ക്ക് കാരണമാകുകയും ചെയ്യുന്നു.
- ഗന്ധം കുറയുന്നു
- വായ്‌നാറ്റം: നീണ്ടുനിൽക്കുന്ന ജലദോഷം തൊണ്ടയിലും മൂക്കിലും കട്ടിയുള്ള മഞ്ഞ, പച്ച നിറങ്ങളിലുള്ള കഫം രൂപപ്പെടുന്നതിന് കാരണമാകും. ഈ കഫം നിങ്ങളുടെ തൊണ്ടയിൽ നിന്ന് താഴേക്ക് പോകുമ്പോൾ, ഇത് നിങ്ങളുടെ ശ്വാസത്തെ ബാധിക്കുകയും വായിൽ നിന്ന് ദുർഗന്ധം വരികയും ചെയ്യും
- പല്ലുവേദന: സൈനസ് വീക്കത്തിന്റെ ഏറ്റവും സാധാരണമായ ലക്ഷണമാണ് പല്ലുവേദന
- കണ്ണുകളുടെ വേദന: ജലദോഷം പതിവിലും കൂടുതൽ ദിവസം നീണ്ടുനിൽക്കുകയും അത് നിങ്ങൾക്ക് കണ്ണുകളിൽ വേദന ഉണ്ടാക്കുകയും ചെയ്യുന്നുവെങ്കിൽ നിങ്ങൾക്ക് സൈനസ് അണുബാധ ഉണ്ടാകാനുള്ള സാധ്യതയുണ്ട്. സൈനസുകൾ കണ്ണുകൾക്ക് താഴെയും മുകളിലുമായും സ്ഥിതി ചെയ്യുന്നതിനാൽ ഈ പ്രദേശങ്ങളിൽ സമ്മർദ്ദം സൃഷ്ടിക്കുമ്പോൾ അത് കണ്ണുകളിൽ വേദനയ്ക്ക് കാരണമാകും.
- ആസ്മ
- ശരീര വേദന
- ശ്വാസംമുട്ടൽ
- മുഖത്ത് പ്രത്യേകിച്ച് മൂക്കിന്റെ ഭാഗങ്ങളിൽ വേദന
- ക്ഷീണം
- ശബ്ദത്തിൽ മാറ്റം
- രുചി കുറയും
- ചെവി വേദന
- പല്ല് പുളിപ്പ്
- പല്ലിന് തരിപ്പ്
- തലകുനിക്കുമ്പോൾ മൂക്കിന് ഭാരം
advertisement
മുഖത്തിന്റെ ഇരുവശങ്ങളിലുമായാണ് വേദന അനുഭവപ്പെടുന്നതെങ്കിൽ അത് മാക്സിലറി സൈനസിലുണ്ടായ അണുബാധയാവാം. നെറ്റിയിലോ പുരികത്തിന്റെ അടിയിലോ ആയി അനുഭവപ്പെടുന്ന വേദന ഫ്രണ്ടൽ സൈനസ് അണുബാധയുടെ ലക്ഷണമാണ്. രാവിലെ എഴുന്നേൽക്കുന്ന സമയത്ത് ഇത്തരം സൈനസൈറ്റിസ് വേദന പ്രകടമാവണമെന്നില്ല. എന്നാൽ ഉച്ചയോട് അടുക്കും തോറും ഈ വേദനയുടെ തോത് കൂടി വരും. ഇരിക്കുന്ന സമയത്താണ് ഈ വേദന കൂടി വരുന്നത്. ഓഫീസ് സൈനസൈറ്റിസ് എന്നും ഈ വേദന അറിയപ്പെടുന്നു. വൈകുന്നേരത്തോടെ ഇത്തരം വേദന കുറയുന്നതായാണ് പൊതുവേ കാണപ്പെടുന്നത്.
Also Read- Sinusitis| സൈനസൈറ്റിസ് രോഗത്തെക്കുറിച്ച് അറിയേണ്ടതെല്ലാം
മൂക്കിനും കണ്ണിനും ഇടയിലുള്ള സൈനസുകളിൽ ഉണ്ടാവുന്ന അണുബാധയാണെങ്കിൽ അത് എത്മോയിഡ് സൈനസൈറ്റിസ് ആവാം. കണ്ണിന് പിന്നിലായിട്ടാണ് വേദന അനുഭവപ്പെടുക. കഴുത്തിന് മുകളിലും തലയുടെ പുറകിലുമായിട്ടാണ് സ്ഫിനോയിഡ് സൈനസ് അണുബാധ പ്രകടമാവുന്നത്. കുനിയുമ്പോഴും തിരിയുമ്പോഴും കഠിനമായ വേദനയാവും ഇത്തരം അണുബാധ മൂലം അനുഭവപ്പെടുന്നത്.
പ്രധാനമായും സൈനസൈറ്റിസ് രണ്ടു തരത്തിലുണ്ട്:
- അക്യൂട്ട് സൈനസൈറ്റിസ്
- ക്രോണിക് സൈനസൈറ്റിസ്
അക്യൂട്ട് സൈനസൈറ്റിസ് ജലദോഷം രൂക്ഷമാകുമ്പോഴാണ് ഉണ്ടാകുന്നത്. ജലദോഷമുള്ളവർ ശക്തമായി മൂക്ക് ചീറ്റുമ്പോൾ മൂക്കിനകത്തുള്ള ബാക്ടീരിയ സൈനസുകളിൽ കടന്ന് രോഗമുണ്ടാക്കുന്നു. അക്യൂട്ട് സൈനസൈറ്റിസിൽ ജലദോഷം, മൂക്കടപ്പ്, തലവേദന എന്നിവ രണ്ടു മൂന്നാഴ്ച മാറാതെ നിൽക്കും. ക്രോണിക് സൈനസൈറ്റിസ്, അക്യൂട്ട് സൈനസൈറ്റിസ് എന്നിവയ്ക്ക് സമാനമായ ലക്ഷണങ്ങളുമുണ്ട്. ക്രോണിക് സൈനസൈറ്റിസിന്റെ ലക്ഷണങ്ങൾ കുറഞ്ഞത് 12 ആഴ്ചയെങ്കിലും നീണ്ടുനിൽക്കും.
ഗുരുതരമായ അണുബാധയെ സൂചിപ്പിക്കുന്ന ഇനിപ്പറയുന്ന ലക്ഷണങ്ങൾ ഉണ്ടെങ്കിൽ ഉടൻ ഒരു ഡോക്ടറെ സമീപിക്കുക
- പനി
- കണ്ണുകൾക്ക് ചുറ്റും വീക്കം അല്ലെങ്കിൽ ചുവപ്പ്
- കഠിനമായ തലവേദന
- നെറ്റിയിൽ വീക്കം
- ആശയക്കുഴപ്പം
- കാഴ്ച കുറവ്
- തൊണ്ടവേദന
സൈനസൈറ്റിസിന് ആശ്വാസം നൽകാൻ നിരവധി വീട്ടുവൈദ്യങ്ങൾ ഉണ്ട്. സൈനസൈറ്റിസ് ലഘൂകരിക്കുന്നതിന് ഭക്ഷണപാനീയങ്ങളിൽ മാറ്റം വരുത്തുക. വറുത്ത ഭക്ഷണം, അരി, സുഗന്ധവ്യഞ്ജനങ്ങൾ എന്നിവ സൈനസ് ലക്ഷണങ്ങൾക്ക് കാരണമാകുന്നവയാണ്. സൈനസ് അണുബാധ ഒഴിവാക്കാൻ ചോക്ലേറ്റ്, പഞ്ചസാര, പാലുൽപ്പന്നങ്ങൾ എന്നിവ കഴിയ്ക്കുന്നതും കുറയ്ക്കണം. ശീതളപാനീയങ്ങൾ കഴിക്കുന്നതും പ്രശ്നങ്ങൾ സൃഷ്ടിക്കും. സൈനസ് അണുബാധയെ പ്രതിരോധിക്കാനുള്ള മികച്ച മാർഗം വൈറ്റമിൻ എ അടങ്ങിയ ഭക്ഷണം ധാരാളമായി കഴിക്കുക എന്നതാണ്.
ധാരാളം വെള്ളം കുടിക്കുന്നതും ശരീരത്തിൽ ജലാംശം നിലനിർത്തുന്നതും നിർജ്ജലീകരണത്തിൽ നിന്ന് രക്ഷിക്കും. ജലം നിങ്ങളുടെ മ്യൂക്കസ് നേർത്തതാക്കുകയും മൂക്കൊലിപ്പ് തടയുകയും ചെയ്യുന്നു.
ചെറുചൂടുള്ള വെള്ളത്തിൽ തേനും അരമുറി നാരങ്ങയുടെ നീരും പിഴിഞ്ഞ് ചേർത്ത് കുടിക്കുക. ഇതും മ്യൂക്കസ് നീക്കം ചെയ്യാൻ സഹായിക്കും.
ആപ്പിൾ സിഡെർ വിനെഗർ നിങ്ങൾക്ക് ആരോഗ്യപരമായ പല ഗുണങ്ങളും നൽകുന്നു. സൈനസൈറ്റിസ് ഒഴിവാക്കുന്നതിനും ഇത് സഹായിക്കുന്നു. ആപ്പിൾ സിഡെർ വിനെഗർ നിങ്ങളുടെ സൈനസ് മർദ്ദം ഒഴിവാക്കുകയും വേദന കുറയ്ക്കുകയും ചെയ്യും.
സാധാരണ ജലദോഷത്തിനും സൈനസൈറ്റിസുമൊക്കെ ആവി കൊള്ളുന്നത് നല്ലതാണ്. എന്നാൽ ആസ്മ, അലർജി രോഗികൾ ആവി കൊള്ളരുത്. ചില മരുന്നുകൾ സ്പ്രേയിങ് ഇൻഹേലർ ആയി ഉപയോഗിക്കാം. മറ്റുള്ളവർ സാധാരണ ജലദോഷം ഉള്ളപ്പോൾ ശുദ്ധമായ വെള്ളം തിളപ്പിച്ച് ആവിയേൽക്കുന്നതു നല്ലതാണ്. വേണമെങ്കിൽ ഏതാനും തുള്ളി ടിൻജർ ബെൻസോയ്ഡ് ആവിപിടിക്കുന്ന വെള്ളത്തിൽ കലർത്താം.
സൈനസ് പ്രഷർ ഒഴിവാക്കാൻ ചില എസൻഷ്യൽ ഓയിലുകൾ ഉപയോഗിക്കാൻ അമേരിക്കൻ സൈനസ് ഇൻസ്റ്റിറ്റ്യൂട്ട് ശുപാർശ ചെയ്യുന്നു. മൂക്കൊലിപ്പ് തടയുന്നതിനായി മെന്തോൾ ഉപയോഗിക്കാം.
ധാരാളം ഔഷധ ഗുണങ്ങൾ അടങ്ങിയ സുഗന്ധവ്യഞ്ജനമാണ് മഞ്ഞൾ. മാത്രമല്ല ഇവയിൽ ധാരാളം ആന്റിഓക്‌സിഡന്റുകളും അടങ്ങിയിട്ടുണ്ട്. ഇഞ്ചിയും മഞ്ഞളും ചേർത്ത് ചൂടുള്ള ചായ തയാറാക്കി കുടിക്കുന്നത് കഫത്തിന് അയവ് വരുത്താനും സൈനസ് മർദ്ദം കുറയ്ക്കാനും സഹായിക്കും.
ആരോഗ്യത്തിന് ഉത്തമമാണ് സൂപ്പ്. സൂപ്പിലെ നീരാവിയും ആരോഗ്യകരമായ ചേരുവകളും സൈനസൈറ്റിസിന് ആശ്വാസമേകും.
അലർജിയുള്ളവർ ശ്രദ്ധിക്കേണ്ട കാര്യങ്ങൾ:
- ഹൃദ്രോഗമുള്ളവർ ഉപയോഗിക്കുന്ന ആസ്പിരിൻ പോലുള്ള മരുന്നുകൾ, രക്തസമ്മർദത്തിനുള്ള ബീറ്റാ ബ്ലോക്കർ ഗുളികകൾ എന്നിവ അലർജി, മൂക്കിനുള്ളിൽ പോളിപ്സ് എന്നിവയ്ക്കു കാരണമാകുന്നുണ്ട്. അത്യാവശ്യമെങ്കിൽ മാത്രമേ ഈ മരുന്നുകൾ ഉപയോഗിക്കാവൂ.
- മൂക്ക് ശക്തമായി ചീറ്റുന്നത് ഒഴിവാക്കുക. മൂക്ക് പിഴിയുകയോ ഉള്ളിലോട്ടു വലിച്ചു തുപ്പുകയോ ചെയ്യാം
- ശ്വാസകോശ സംബന്ധമായ അണുബാധകൾ തുടക്കത്തിൽ തന്നെ ചികിത്സിക്കണം.
- തണുപ്പുമായുള്ള സമ്പർക്കം കഴിവതും ഒഴിവാക്കുക.
- തണുത്ത ഭക്ഷണപദാർഥങ്ങൾ, പുളിരസം, പുളി രുചിയുള്ള പഴങ്ങൾ എന്നിവ കഴിക്കുന്നത് പരമാവധി കുറയ്ക്കുക
- ഉറങ്ങാതിരിക്കുന്നത് പരമാവധി ഒഴിവാക്കുക.
- മാനസിക സമ്മർദം കുറയ്ക്കുക.