മേക്ക് ഓവറുകളിലൂടെ ട്രെൻഡ് സെറ്റ് ചെയ്യുന്നതിൽ മുൻപന്തിയിലാണ് ധോണി. എന്നാൽ ഇത്തവണ യോഗിയുടെ വേഷത്തിലെത്തിയത് ആരാധകർക്ക് തീർത്തും കൗതുകകരമായി. ഐ പി എൽ പരസ്യചിത്രത്തിന് വേണ്ടിയാണ് ധോണിയുടെ പുതിയ ലുക്ക്. സ്റ്റാർ സ്പോർട്സാണ് ചിത്രം സമൂഹ മാധ്യമങ്ങളിൽ പങ്കുവച്ചത്.
Also Read- റൊണാൾഡോയ്ക്ക് തകർപ്പൻ ഹാട്രിക്ക്; മറികടന്നത് ഇതിഹാസതാരം പെലെയുടെ റെക്കോർഡ്
താരത്തിന്റെ പുതിയ ലുക്കിനെ ട്രോളിക്കൊണ്ട് ഇപ്പോൾ രംഗത്തെത്തിയിരിക്കുന്നത് മുൻ ഇന്ത്യൻ താരം വസീം ജാഫറാണ്. 'തലൈ ലാമ' എന്ന് കുറിച്ചു കൊണ്ടാണ് ഈ ചിത്രം വസീം ജാഫർ തന്റെ ട്വിറ്റർ ഹാൻഡിലിൽ പങ്കിട്ടത്. സമൂഹ മാധ്യമങ്ങളിൽ നിലവാരമുള്ള ട്രോളുകളിലൂടെ പ്രതികരിക്കുന്നത് വസീം ജാഫറിന്റെ ശീലമാണ്. ട്രോളുകൾക്ക് നല്ല സ്വീകാര്യതയും ലഭിക്കുന്നുണ്ട്. ഇന്ത്യൻ ക്രിക്കറ്റ് ആരാധകരുടെ സ്വന്തം 'തല' തന്നെയാണ് ധോണി. കഴിഞ്ഞ ദിവസം മുൻ ഇംഗ്ലണ്ട് നായകൻ മൈക്കൽ വോണിനെതിരെയും താരം ട്രോളിലൂടെ വിമർശിച്ച് രംഗത്തെത്തിയിരുന്നു. ഇംഗ്ലണ്ടിനെതിരായ ആദ്യ ഏകദിനം തോറ്റ ഇന്ത്യൻ ടീമിനെക്കാൾ മികച്ചത് മുംബൈ ഇന്ത്യൻസ് ടീമാണെന്നായിരുന്നു വോണിന്റെ പരാമർശം. എല്ലാ ടീമുകൾക്കും ഇംഗ്ലണ്ട് ടീമിനെ പോലെ 4ഓവർസീസ് കളിക്കാരെ ടീമിൽ ഉൾപ്പെടുത്താൻ കഴിഞ്ഞെന്ന് വരില്ല എന്നാണ് വസീം ജാഫർ ട്രോളിലൂടെ പ്രതികരിച്ചത്.
ഐ പി എല്ലിന് മുന്നോടിയായി സ്റ്റാർ സ്പോർട്സ് നിർമിച്ച പരസ്യത്തിനായാണ് ധോണി തല മൊട്ടയടിച്ചത്. ധോണിയെ വച്ച് മറ്റൊരു പരസ്യം കൂടി സ്റ്റാർ സ്പോർട്സ് ചെയ്തിട്ടുണ്ട്. പരസ്യങ്ങളും ഇതിനിടെ സമൂഹമാധ്യമങ്ങളിൽ വൈറലായിരിക്കുകയാണ്. ലോക്ക്ഡൗൺ സമയത്ത് ഇതുപോലെ മകൾ സിവയുടെ ഇൻസ്റ്റാഗ്രാം അക്കൗണ്ടിലൂടെ പങ്കുവച്ച നരച്ച താടിയുള്ള തടിച്ച ധോണിയുടെ ഫോട്ടോയും വൈറലായിരുന്നു.
Also Read- അന്താരാഷ്ട്ര ടി20യിൽ 3000 റൺസ്; തകർപ്പൻ റെക്കോർഡുമായി വിരാട് കോഹ്ലി
അടുത്ത മാസം 9 നാണ് ഈ വർഷത്തെ ഐ പി എൽ തുടങ്ങുന്നത്. ആറ് ഇന്ത്യൻ വേദികളിലാണ് മത്സരങ്ങൾ ക്രമീകരിച്ചിരിക്കുന്നത്.