കഴിഞ്ഞ മത്സരത്തിൽ ഇന്ത്യക്കായി ഇന്നിംഗ്സ് ഓപ്പൺ ചെയ്ത യുവതാരം ഋതുരാജ് ഗെയ്ക്‌വാദ് പരിക്ക് മൂലമാണ് പുറത്തിരിക്കുന്നതെന്ന് ക്യാപ്റ്റൻ രോഹിത് ശർമ (Rohit Sharma) പറഞ്ഞു. പരിക്ക് ഭേദമായി രവീന്ദ്ര ജഡേജയും (Ravidnra Jadeja) വിൻഡീസിനെതിരായ പരമ്പരയിൽ നിന്നും വിട്ടുനിന്ന ജസ്പ്രീത് ബുമ്രയും (Jasprit Bumrah) ഇന്ത്യന്‍ ടീമിലേക്ക് തിരിച്ചെത്തി. ഇവർക്ക് പുറമെ കഴിഞ്ഞ മത്സരത്തിൽ പുറത്തിരുന്ന യുസ്‌വേന്ദ്ര ചാഹലും ഭുവനേശ്വർ കുമാറും അന്തിമ ഇലവനിലേക്ക് തിരിച്ചെത്തിയിട്ടുണ്ട്.
ഓസീസിനെതിരെ അവസാന ടി20യിൽ കളിച്ച ടീമിൽ നിന്നും രണ്ട് മാറ്റങ്ങൾ വരുത്തിയാണ് ശ്രീലങ്ക ഇറങ്ങുന്നത്. മഹേഷ് തീക്ഷണയ്ക്കും കുശാല്‍ മെന്‍ഡിസിനും പകരം ദിനേശ് ചണ്ടിമലും ജെഫ്രി വാന്‍ഡെര്‍സേയുമാണ് ടീമിലിടം നേടിയത്.
ദക്ഷിണാഫ്രിക്കൻ പര്യടനത്തിൽ ടെസ്റ്റിലും ഏകദിനത്തിലുമേറ്റ തിരിച്ചടി വെസ്റ്റ് ഇൻഡീസിനെതിരായ ജയത്തോടെ ഇന്ത്യ മായ്ച്ച് കളഞ്ഞിരിക്കുകയാണ്. രോഹിത് ശര്‍മയുടെ ക്യാപ്റ്റൻസിക്ക് കീഴിൽ ലഭിച്ച സ്വപ്നതുല്യമായ തുടക്കം തുടരാനുള്ള ശ്രമത്തിലാണ് ഇന്ത്യ. വിൻഡീസിനെ തൂത്തുവാരിയ ഇന്ത്യൻ സംഘം അതേ പ്രകടനം തന്നെ അവർത്തിക്കാനാകും ലക്ഷ്യമിടുന്നത്. അതേസമയ൦, ഓസ്‌ട്രേലിയയ്‌ക്കെതിരായ ടി20 പരമ്പര 4-1നു തോറ്റതിന്റെ നിരാശയിൽ നിന്നും കരകയറാനാകും ലങ്ക ശ്രമിക്കുക. ടി20യിൽ ഒന്നാം റാങ്കിലുള്ള ഇന്ത്യക്കെതിരെ ഇന്ത്യൻ മണ്ണിൽ നീണ്ട ഇടവേളയ്ക്ക് ശേഷം ടി20 പരമ്പര സ്വന്തമാക്കാനും അവർ ലക്ഷ്യമിടുന്നു. 2008നുശേഷം ഇന്ത്യയില്‍ ഒരു പരമ്പരയും ജയിച്ചിട്ടില്ലെന്ന നാണക്കേടിന്റെ റെക്കോർഡ് അവർക്ക് മുന്നിലുണ്ട്.
ഇന്ത്യ: രോഹിത് ശര്‍മ (ക്യാപ്റ്റന്‍), ഇഷന്‍ കിഷന്‍ (വിക്കറ്റ് കീപ്പര്‍), ശ്രേയസ് അയ്യര്‍, സഞ്ജു സാംസണ്‍, വെങ്കടേഷ് അയ്യര്‍, രവീന്ദ്ര ജഡേജ, ഹര്‍ഷല്‍ പട്ടേല്‍, ഭുവനേശ്വര്‍ കുമാര്‍, ജസ്പ്രീത് ബുമ്ര, യുസ്‌വേന്ദ്ര ചാഹൽ.
ശ്രീലങ്ക : പാതും നിസ്സംഗ, കമിൽ മിഷാര, ചരിത് അസലങ്ക, ദിനേഷ് ചണ്ഡിമൽ (വിക്കറ്റ് കീപ്പർ), ജനിത് ലിയാനഗെ, ദസുൻ ഷനക (ക്യാപ്റ്റൻ), ചാമിക കരുണരത്‌നെ, ജെഫ്രി വാൻഡർസെ, പ്രവീൺ ജയവിക്രമ, ദുഷ്മന്ത ചമീര, ലഹിരു കുമാര.