തൃഷയുമായി കിടപ്പറ രംഗം പ്രതീക്ഷിച്ചെന്ന് നടൻ മൻസൂർ അലിഖാൻ; ചുട്ട മറുപടിയുമായി നടി

Trisha Mansoor Ali Khan | നടി തൃഷയ്ക്കെതിരെ ലിയോ താരം മൻസൂർ അലി ഖാൻ നടത്തിയ പരാമർശത്തിൽ വ്യാപക വിമർശനം. ലിയോയിൽ തൃഷയുമൊത്തുള്ള കിടപ്പറ രംഗം പ്രതീക്ഷിച്ചെന്നാണ് മൻസൂർ അലി ഖാൻ നടത്തിയ പരാമർശം. ഇതിൽ രൂക്ഷ വിമർശനവുമായി നടി തൃഷ രംഗത്തെത്തി.

മൻസൂർ അലി ഖാൻ എന്നെക്കുറിച്ച് നീചവും വെറുപ്പുളവാക്കുന്നതുമായ രീതിയിൽ സംസാരിച്ച ഒരു വീഡിയോ കണ്ടതായും, അതിനെ ശക്തമായി അപലപിക്കുന്നതായും തൃഷ പറഞ്ഞു. ഇത്തരത്തിൽ ലൈംഗകതയും അനാദരവും സ്ത്രീവിരുദ്ധതയും പ്രകടിപ്പിക്കാൻ മോശം സ്വഭാവമുള്ളവർക്കേ കഴിയൂവെന്നും തൃഷ ട്വിറ്ററിൽ കുറിച്ചു.

'അയാളെപ്പോലുള്ളവർക്കൊപ്പം ഒരിക്കലും സ്‌ക്രീൻ സ്പേസ് പങ്കിടാത്തതിൽ ഞാൻ ഇപ്പോൾ സന്തോഷവതിയാണ്, എന്റെ സിനിമാ ജീവിതത്തിന്റെ ഇനിയുള്ള കാലത്തും അത് ഒരുകാരണവശാലും സംഭവിക്കില്ലെന്ന് ഞാൻ ഉറപ്പാക്കും. അയാളെ പോലുള്ളവർ മനുഷ്യരാശിക്ക് തന്നെ അപമാനമാണ്', തൃഷ കുറിച്ചു.

കുറച്ചുനാൾ മുമ്പാണ് ലിയോയുമായി ബന്ധപ്പെട്ട് മാധ്യമങ്ങളോട് സംസാരിക്കുമ്പോഴാണ് മൻസൂർ അലിഖാന്‍റെ വിവാദ പരാമർശം ഉണ്ടായത്. നേരത്തെ ചില സിനിമകളിൽ ഖുശ്ബുവിനെയും റോജയെയും കട്ടിലിലേക്ക് ഇടുന്നത് പോലെ തൃഷയെ ഇടാൻ പറ്റിയില്ലെന്നും താൻ ചെയ്ത സിനിമകളിലെ റോപ് സീനുകളൊന്നും ലിയോയിൽ ഉണ്ടായിരുന്നില്ലെന്നുമാണ് മൻസൂർ അലിഖാൻ പറഞ്ഞത്.

ലിയോയിൽ ഒരു കിടപ്പറ രംഗം കാണുമെന്ന് പ്രതീക്ഷിച്ചെന്നും അതിന് ആഗ്രഹമുണ്ടായിരുന്നു എന്നും മൻസൂർ അലിഖാൻ പറഞ്ഞിരുന്നു. തൃഷയും വിജയിയും കേന്ദ്രകഥാപാത്രങ്ങളായ ലിയോയില്‍, പ്രധാനപ്പെട്ട വേഷമാണ് മൻസൂറും ചെയ്തത്.

പുതിയ സംഭവങ്ങളിൽ തൃഷയ്ക്ക് പിന്തുണയുമായി ലിയോയുടെ സംവിധായകൻ ലോകേഷ് കനകരാജും രംഗത്തെത്തി. മൻസൂർ അലിഖാന്‍റെ സ്ത്രീവിരുദ്ധ പ്രസ്താവനയിൽ നിരാശയും രോഷവും തോന്നി. സ്ത്രീകൾ, സഹകലാകാരൻമാർ, പ്രൊഫഷണലുകൾ എന്നിവരോടുള്ള ബഹുമാനം അമൂല്യമായ ഒന്നായിരിക്കണം. മൻസൂറിന്‍റെ പരാമർശത്തെ ശക്തമായി അപലപിക്കുന്നതായും ലോകേഷ് പറഞ്ഞു.

വിവാദ പരാമർശങ്ങളിൽ മൻസൂർ അലിഖാനെതിരെ സോഷ്യൽ മീഡിയയിൽ വിമർശനം ശക്തമാണ്. നിരവധി ആളുകളാണ് മൻസൂറിന്‍റെ പ്രസ്താവനയെ അപലപിച്ച് രംഗത്തെത്തുന്നത്. തെന്നിന്ത്യൻ സിനിമാരംഗത്തെ പ്രമുഖരും മൻസൂറിനെതിരെ രംഗത്തെത്തിയിട്ടുണ്ട്.