കോടീശ്വരനായ നടന്റെ മകൾ ഹോട്ടലിൽ വെയ്റ്റർ പണി ചെയ്തതെന്തിന്? ഇന്ന് കോടികൾ വിലയുള്ള നായിക

ബോളിവുഡ് എന്ന സ്വപ്നഭൂമിയിൽ ഒരു കരിയർ പടുതിയർത്താൻ പെടാപ്പാടുപെടുന്ന വ്യക്തികൾ നിരവധിയാണ്. പലതരം ത്യാഗങ്ങൾ സഹിച്ചാണ് പലരും അവിടം വരെയും എത്തിച്ചേരുന്നത്. ഉന്നത വിദ്യാഭ്യാസവും മികച്ച കരിയറുകളും ഉപേക്ഷിച്ച് സിനിമയുടെ പിറകെ പായുന്നവരെയും ഇവിടെ കാണാം. മറ്റുചിലരാകട്ടെ, ചെറിയ ജോലികൾ ചെയ്തു തുടങ്ങി സിനിമയിൽ വിജയക്കൊടി പാറിക്കും. അത്തരമൊരു സിനിമാ യാത്രയുടെ കഥയുണ്ട് ഈ താരപുത്രിക്ക്. ബോളിവുഡിലെ അറിയപ്പെടുന്ന നടന്റെ മകളാണ്. രാജ്യത്തെ പ്രശസ്തയായ താരമാകും മുൻപേ അവർ കാപ്പിയും സാൻഡ്‌വിച്ചും ടേബിളുകളിൽ എത്തിക്കുന്ന തൊഴിൽ ചെയ്തിരുന്നു

ആ നടിയാണ് നടൻ ശക്തി കപൂറിന്റെ മകൾ ശ്രദ്ധ കപൂർ. സ്ക്രീൻ പ്രെസൻസിന്റെ പേരിലാണ് ശ്രദ്ധ കപൂർ കൂടുതലായും ശ്രദ്ധിക്കപ്പെട്ടു തുടങ്ങിയത്. പല തലമുറകളുടെ സ്നേഹവും കരുതലും സ്വന്തമാക്കിയ താരം, ഹിന്ദി സിനിമാ മേഖലയിലെ മുന്നിര നായികമാരിൽ ഒരാളാണ് (തുടർന്ന് വായിക്കുക)

കോടീശ്വരനായ നടന്റെ മകളെങ്കിലും, ശ്രദ്ധയ്ക്ക് ജീവിതയാത്ര അത്ര എളുപ്പമായിരുന്നില്ല. അമേരിക്കയിൽ ഉന്നതപഠനം നടത്തിയ വേളയിൽ അവർ പാർട്ട്-ടൈമായി ജോലി ചെയ്തിരുന്ന കാര്യം ലിങ്ക്ഡ്ഇൻ പ്രൊഫൈലിൽ പങ്കിട്ടു. സ്റ്റാർബക്ക്‌സിൽ കോഫി വിളമ്പിയും ഐൻസ്റ്റീൻ ബ്രോസ് ബാഗെൽസിൽ സാൻഡ്വിച്ച് വിറ്റും ചിലവിനുള്ള തുക കണ്ടെത്തിയിരുന്നു ശ്രദ്ധ. അതിനു ശേഷമാണ് അവർ ഇന്ത്യയിലേക്ക് തിരിച്ചത്

മനഃശാസ്ത്ര പഠനത്തിനായി ശ്രദ്ധ കപൂർ ബോസ്റ്റൺ സർവകലാശാലയിൽ വിദ്യാർത്ഥിനിയായി ചേർന്നു. ആദ്യ വർഷം തന്നെ തന്റെ ജീവിതം മാറ്റിമറിക്കുന്ന ഒരു തീരുമാനം അവർ കൈക്കൊണ്ടു. പഠനം പാതിവഴിയിൽ ഉപേക്ഷിച്ച ശ്രദ്ധ, അവരുടെ പാഷനായ അഭിനയത്തിൽ ശ്രദ്ധകേന്ദ്രീകരിക്കാൻ തീരുമാനമെടുത്തു

'തീൻ പത്തി' എന്ന സിനിമയിലൂടെ ശ്രദ്ധ ബോളിവുഡിൽ പ്രവേശിച്ചു. സിനിമ വിജയകരം എന്ന് വിളിക്കാൻ പറ്റില്ലെങ്കിലും, ശ്രദ്ധയുടെ പേര് ഏവർക്കും സുപരിചിതമാണ്. ഇതവർക്ക് കൂടുതൽ അവസരങ്ങൾക്ക് വഴിതുറന്നു

ആഷിഖി 2, ചിച്ചോരെ, ഒകെ ജാനു, സ്‌ത്രീ പോലുള്ള സിനിമകൾ ഒരു മികച്ച പ്രകടനം കാഴ്ചവച്ച നടി എന്ന പേരിൽ അവരുടെ സ്ഥാനം ഊട്ടിയുറപ്പിച്ചു. ലോകമെമ്പാടും നിന്നായി 884.45 കോടി കളക്റ്റ് ചെയ്ത അവരുടെ ഏറ്റവും പുതിയ ചിത്രമായ 'സ്ത്രീ 2' ശ്രദ്ധയുടെ പ്രശ്തി ഉയർത്തി. 2024ലെ മികച്ച കളക്ഷൻ നേടിയ ഹിന്ദി ചിത്രങ്ങളിൽ ഒന്നായിരുന്നു ഇത്

ശ്രദ്ധ കപൂറിന്റെ നേട്ടങ്ങൾ സിനിമയിൽ മാത്രം ഒതുങ്ങുന്നില്ല. അവർ സംരംഭക എന്ന നിലയിലും ചുവടുറപ്പിച്ചിരുന്നു. 2023ൽ പൽമൊനാസ് എന്ന ഡെമി-ഫൈൻ ആഭരണ ബ്രാൻഡിന്റെ കോ-ഫൗണ്ടർ ആയി ശ്രദ്ധ കപൂർ മാറിയിരുന്നു

2022ൽ ഓർത്തോപീഡിക് സർജനിൽ നിന്നും സംരംഭകനായി മാറിയ ഡോക്‌ടർ അമോൽ പട്വർ, അദ്ദേഹത്തിന്റെ ഭാര്യ പല്ലവി മോഹാദികർ എന്നിവർ ചേർന്നാരംഭിച്ച സംരംഭമാണിത്

കോളേജ് വിദ്യാഭ്യാസം പാതിവഴിയിൽ ഉപേക്ഷിച്ചും, ആദ്യ സിനിമ ബോക്സ് ഓഫീസിൽ വിജയം കാണാതെപോവുകയും, പഠനത്തിനിടെ വെയ്റ്ററായി ജോലി ചെയ്യുകയും ചെയ്ത് ജീവിതവിജയം കൈപ്പിടിയിൽ ഒതുക്കിയ ശ്രദ്ധയുടെ ജീവിതം എന്തുകൊണ്ടും കഠിനാധ്വാനത്തിന്റെയും ദൃഢനിശ്ചയത്തിന്റെയും ഉദാഹരണമായി എടുത്തുപറയാം