ഭാഗ്യയെ ശ്രേയസിന് കൈപിടിച്ച് നല്‍കി സുരേഷ് ഗോപിയും രാധികയും; ചിത്രങ്ങള്‍

നടനും ബിജെപി നേതാവുമായ സുരേഷ് ഗോപിയുടെ മകള്‍ ഭാഗ്യ സുരേഷ് വിവാഹിതയായി. മാവേലിക്കര സ്വദേശി ശ്രേയസ് മോഹനാണ് വരന്‍.

ഗുരുവായൂര്‍ ക്ഷേത്ര സന്നിധിയിലെ കതിര്‍മണ്ഡപത്തില്‍ പ്രധാനമന്ത്രി നരേന്ദമോദി, നടന്മാരായ മോഹന്‍ലാല്‍, മമ്മൂട്ടി, ദിലീപ്, ജയറാം എന്നിവരടക്കമുള്ള താരനിരയെ സാക്ഷിയാക്കിയാണ് ശ്രേയസ് ഭാഗ്യയുടെ കഴുത്തില്‍ താലിചാര്‍ത്തിയത്.

വിവാഹ ചടങ്ങളില്‍ ഉടനീളം പങ്കെടുത്ത മോദി വധൂവരന്മാരെ അക്ഷതം നല്‍കി അനുഗ്രഹിച്ച ശേഷമാണ് മടങ്ങിയത്. ക്ഷേത്രത്തിലെ താലികെട്ടിന് ശേഷം സമീപത്തെ കണ്‍വെന്‍ഷന്‍ സെന്റില്‍ നടന്ന വിവാഹ ചടങ്ങില്‍ വെച്ച് സുരേഷ് ഗോപിയും രാധികയും ചേര്‍ന്ന് ഭാഗ്യയെ ശ്രേയസിന് കൈപിടിച്ച് നല്‍കി.

സ്വര്‍ണാഭരണങ്ങള്‍ അധികം ഉപയോഗിക്കാതെയും ഓറഞ്ച് നിറത്തിലുള്ള പട്ട് സാരി അണിഞ്ഞും ലളിതമായ വേഷവിധാനത്തോടെയാണ് ഭാഗ്യ വിവാഹത്തിനെത്തിയത്. 

വിവാഹത്തലേന്ന് തന്നെ സൂപ്പർതാരങ്ങളായ മമ്മൂട്ടിയും മോഹൻലാലും ഗുരുവായൂരിൽ എത്തിച്ചേർന്നിരുന്നു. കുടുംബസമേതമാണ് ഇരുവരും സുരേഷ് ഗോപിയുടെ മകളുടെ വിവാഹത്തിനെത്തിയത്. 

ബിജു മേനോൻ, ഖുശ്ബു, ഷാജി കൈലാസ്, പാർവതി, രചന നാരായണൻകുട്ടി, സരയു, ഹരിഹരൻ,  നിർമാതാവ് സുരേഷ് കുമാർ തുടങ്ങിവരും വിവാഹത്തിൽ പങ്കെടുക്കാൻ എത്തിയിരുന്നു. 

19-ന് സിനിമാ താരങ്ങൾക്കും രാഷ്‌ട്രീയ പ്രമുഖർക്കുമായി കൊച്ചിയിൽ വിരുന്ന് നടത്തും. ബന്ധുക്കൾ, നാട്ടുകാർ, സുഹൃത്തുക്കൾ തുടങ്ങിയവർക്കായി 20-ാം തീയതി തിരുവനന്തപുരത്ത് റിസപ്ഷൻ നടത്തും.