8096 കോടി രൂപയുടെ ആസ്തിയോ! ഷാരൂഖ് ഖാനും ഭാര്യ ഗൗരി ഖാനും ചേർന്ന് സമ്പാദിച്ചത്!

കിംഗ് ഖാൻ എന്ന വിശേഷണം എല്ലാ അർത്ഥത്തിലും ഇണങ്ങുന്ന താരമാണ് ഷാരൂഖ് ഖാൻ. ഈ വർഷം പുറത്തിറങ്ങിയ ഏറ്റവും കൂടുതൽ കളക്ഷൻ നേടിയ ചിത്രങ്ങളിൽ ആദ്യ രണ്ട് സ്ഥാനവും ഷാരൂഖ് ചിത്രങ്ങൾക്കാണ്.

1,148 കോടിയാണ് ജവാൻ ആഗോളതലത്തിൽ നേടിയത്. ജവാൻ നേടിയത് 1050 കോടിയും. 200 കോടിയുടെ ബംഗ്ലാവ്, ഒരു സിനിമയ്ക്ക് നൂറ് കോടിക്ക് മുകളിൽ പ്രതിഫലം, വിവിധ മേഖലകളിലെ നിക്ഷേപം, പരസ്യ ചിത്രങ്ങളിലെ വരുമാനം തുടങ്ങി കോടികളാണ് പ്രതിവർഷം ഷാരൂഖിന്റെ വരുമാനം.

ഷാരൂഖിന്റെ ഭാര്യ ഗൗരി ഖാനും ബോളിവുഡിലെ കോടിപതിയാണ്. ഗൗരി ഖാൻ എന്ന പേരിൽ ഇന്റീരിയർ ഡിസൈൻ സ്റ്റുഡിയോയുടെ ഉടമയാണ് ഗൗരി. ബോളിവുഡിലെയും മറ്റ് പല പ്രമുഖ വ്യക്തികളുടേയും വസതികളുടെ ഇന്റീരിയർ ഡിസൈൻ ചെയ്തത് ഗൗരി ഖാനാണ്.

ബോളിവുഡിലെ ഏറ്റവും സമ്പന്നരായ ദമ്പതികളാണ് ഷാരൂഖും ഗൗരിയും. ഇരുവർക്കും ചേർന്ന് ആകെ 8096 കോടിയുടെ ആസ്തിയുണ്ടെന്നാണ് റിപ്പോർട്ടുകൾ. ബോളിവുഡിലെ സൂപ്പർഹിറ്റ് പ്രൊഡക്ഷൻ ഹൗസുകളിലൊന്നായ റെഡ് ചില്ലീസ് എന്റർടെയ്ൻമെന്റസിന്റെ ഉടമകൾ കൂടിയാണ് ഷാരൂഖും ഗൗരിയും.

യഷ് രാജ് ഫിലിംസ് ചെയർമാനും എംഡിയുമായ ആദിത്യ ചോപ്ര, ഭാര്യയും നടിയുമായ റാണി മുഖർജി എന്നിവരാണ് ഷാരൂഖിനും ഗൗരിക്കും തൊട്ടുപിന്നിൽ പട്ടികയിൽ രണ്ടാമതായുള്ളത്. 7400 കോടി രൂപയുടെ ആസ്തിയാണ് ഇരുവർക്കും ചേർന്നുള്ളത്.

സോനം കപൂർ- ആനന്ദ് അഹൂജ എന്നിവരാണ് പട്ടികയിലെ മൂന്നാമത്തെ ദമ്പതികൾ. ഇരുവർക്കുമായി 4900 കോടി രൂപയുടെ ആസ്തിയാണുള്ളത്.

ആയിരം കോടിക്കു മുകളിൽ ആസ്തിയുള്ള താര ദമ്പതികളുടെ പട്ടികയിൽ അമിതാഭ് ബച്ചനും ജയ ബച്ചനും, ഐശ്വര്യ റായിയും അഭിഷേക് ബച്ചനും പട്ടികയിലിടം പിടിച്ചിട്ടുണ്ട്.

അമിതാഭ് ബച്ചൻ-ജയ ബച്ചന് ദമ്പതികളുടെ ആസ്തി 2994 കോടി രൂപയാണെങ്കിൽ ഐശ്വര്യയ്ക്കും അഭിഷേകിനും ചേർത്ത് 1006 കോടി രൂപയുടെ ആസ്തിയാണുള്ളത്. താര കുടുംബത്തിന്റെ ആകെ ആസ്തി ഇതോടെ 4000 കോടിയോളമാകും.