COVID 19 | സൗദിയില്‍ ആറ് മരണം കൂടി; രോഗബാധിതരുടെ എണ്ണം അയ്യായിരത്തിലേക്ക്

റിയാദ്: കോവിഡ് 19 ബാധിച്ച് കഴിഞ്ഞ ദിവസം ആറ് പേർ കൂടി മരിച്ചതോടെ സൗദിയിൽ വൈറസ് ബാധിച്ച് മരിച്ചവരുടെ എണ്ണം 65 ആയി.

കൊറോണ ഏറ്റവും രൂക്ഷമായി ബാധിച്ച ഗൾഫ് രാഷ്ട്രങ്ങളിലൊന്നായ ഇവിടെ കഴിഞ്ഞ ദിവസം മാത്രം 472 പേർക്കാണ് രോഗം സ്ഥിരീകരിച്ചത്

ഇതോടെ രാജ്യത്തെ ആകെ രോഗബാധിതരുടെ എണ്ണം 4934 ആയി. ഇതിൽ 805 പേർ രോഗമുക്തി നേടിയതായും ആരോഗ്യമന്ത്രാലയം വ്യക്തമാക്കിയിട്ടുണ്ട്

'ആളുകൾ തിങ്ങിനിറഞ്ഞ് താമസിക്കുന്ന ഇടങ്ങളിലാണ് വൈറസ് ബാധിതരുടെ എണ്ണത്തിൽ വലിയ തോതിൽ വർധനവുണ്ടാകുന്നത്. ആ സാഹചര്യത്തിൽ ഇത്തരം മേഖലകളിൽ താമസിക്കുന്നവർ കഴിവതും വീടുകൾക്കുള്ളിൽ തന്നെ തുടരാൻ അഭ്യർഥിക്കുകയാണ്.. ശക്തമായ മുന്‍ കരുതലുകളും സ്വീകരിക്കണം..' സൗദി ആരോഗ്യ മന്ത്രി തൗഫിഖ് അൽ റബിഅ അറിയിച്ചു.

ഇക്കാര്യത്തിൽ എല്ലാവരുടെയും സഹകരണം ആവശ്യമാണെന്ന് കാര്യവും അദ്ദേഹം പ്രത്യേകം ഓർമിപ്പിച്ചു.

കനത്ത വെല്ലുവിളിയാണ് നമ്മൾ നേരിടുന്നത്.. എല്ലാവരും വീടുകളിൽ തന്നെ തുടരണം.. അത്യാവശ്യകാര്യങ്ങൾക്കല്ലാതെ പുറത്തിറങ്ങരുത്..' ആരോഗ്യമന്ത്രി ഓർമിപ്പിച്ചു.

കൊറോണ വ്യാപനത്തിന്റെ പശ്ചാത്തലത്തിൽ കർഫ്യു അടക്കമുള്ള കർശന നിയന്ത്രണങ്ങളാണ് സൗദിയിൽ ഏർപ്പെടുത്തിയിരിക്കുന്നത്.

ആദ്യ കൊറോണ കേസ് റിപ്പോർട്ട് ചെയ്യപ്പെട്ടത് മുതൽ 40000 പേരെയാണ് രാജ്യത്ത് ക്വാറന്റൈൻ ചെയ്തത്.

7000 പേർ ഇപ്പോഴും ക്വാറന്റൈനിൽ കഴിയുന്നുണ്ടെന്നും ആരോഗ്യമന്ത്രി അറിയിച്ചു.