ഇടുക്കിയിൽ മ്ലാവിനെ വെടിവച്ച് കൊന്ന് ഇറച്ചി കടത്താൻ ശ്രമിച്ച നാല് പേർ അറസ്റ്റിൽ

ഇടുക്കിയിൽ മ്ലാവിനെ വെടിവച്ച് കൊന്ന് ഇറച്ചി കടത്തിയ സംഘത്തെ പിടികൂടി. മുറിഞ്ഞപുഴ വനപാലക സംഘമാണ് നാല് പേരെ പിടികൂടിയത്.

മുറിഞ്ഞപുഴ ഫോറസ്റ്റ് സ്റ്റേഷൻ പരിധിയിലെ വണ്ടിപ്പെരിയാർ സത്രം പുതുവൽ ഭാഗത്ത്‌ മ്ലാവിനെ വെടിവെച്ചു കൊന്ന് കടത്താൻ ശ്രമിച്ച 4 പ്രതികളെയാണ് പിടികൂടിയത്. 

 ഇറച്ചി കടത്തി കൊണ്ട് പോയ വാഹനവും, തോക്കും മ്ലാവിന്റെ ഇറച്ചിയും തിരകളും ഇവരിൽ നിന്നും വനപാലകർ കണ്ടെടുത്തു. 

കഴിഞ്ഞ ദിവസം രാത്രിയോടെ സത്രം ഭാഗത്ത് വെടിയൊച്ച കേട്ടതായി നാട്ടുകാർ പട്രോളിംഗ് നടത്തിവന്ന വനപാലകസംഘത്തെ അറിയിച്ചു. തുടർന്ന് വനപാലകസംഘം നടത്തിയ പരിശോധനയിലാണ് പ്രതികൾ പിടിയിലായത്.

മുണ്ടക്കയം സ്വദേശികളായ ജിൻസ് ജോസ്, ജോസഫ് ആന്റണി,  പെരുവന്താനം സ്വദേശി ടോമി മാത്യു, കല്ലാർ സ്വദേശികെ ഷിബു എന്നിവരാണ് പിടിയിലായത്. പിടികൂടിയ പ്രതികളെ കോടതിയിൽ ഹാജരാക്കും.