പാൻ-ആധാർ ലിങ്ക് ചെയ്തില്ലെങ്കിൽ പണി കിട്ടും! വീട്ടമ്മമാർക്ക് നിർബന്ധമാണോ? അറിയേണ്ടതെല്ലാം

പാൻ കാർഡും  ആധാറും തമ്മിൽ ബന്ധിപ്പിക്കാനുള്ള സമയപരിധി അവസാനിക്കാൻ ഇനി ദിവസങ്ങൾ മാത്രം. സെൻട്രൽ ബോർഡ് ഓഫ് ഡയറക്ട് ടാക്‌സസ് (CBDT) നൽകിയ നിർദ്ദേശപ്രകാരം 2025 ഡിസംബർ 31 ആണ് ലിങ്കിംഗിനുള്ള അവസാന തീയതി. ഈ കാലാവധിക്കുള്ളിൽ നടപടികൾ പൂർത്തിയാക്കിയില്ലെങ്കിൽ 2026 ജനുവരി 1 മുതൽ നിങ്ങളുടെ പാൻ കാർഡ് പ്രവർത്തനരഹിതമാകും. (Photo: Pexels)

നിങ്ങളുടെ പാൻ കാർഡ് പ്രവർത്തനരഹിതമായാൽ അത് റദ്ദാക്കപ്പെട്ടു എന്ന് അർത്ഥമില്ല. പക്ഷേ, അത് സാധാരണ നിലയിൽ ഉപയോഗിക്കാൻ സാധിക്കില്ല. ഇത് നിങ്ങളുടെ സാമ്പത്തിക കാര്യങ്ങളെ  ബാധിക്കും. പിന്നീടങ്ങോട്ട് നിങ്ങൾക്ക് ആദായനികുതി റിട്ടേണുകൾ (ITR) ഫയൽ ചെയ്യാൻ കഴിയില്ല. കൂടാതെ നിങ്ങൾക്ക് ലഭിക്കാനുള്ള ടാക്‌സ് റീഫണ്ടുകൾ ആദായനികുതി വകുപ്പ് തടഞ്ഞുവെക്കും. ബാങ്ക് ഇടപാടുകൾ, വസ്തു വാങ്ങൽ, ലോൺ അപേക്ഷകൾ തുടങ്ങിയ പ്രധാന സാമ്പത്തിക പ്രക്രിയകൾ പൂർത്തിയാക്കാൻ സാധിക്കാതെ വരും. പാൻ കാർഡ് വീണ്ടും പ്രവർത്തനക്ഷമമാക്കാൻ ഏക വഴി പാൻ കാർഡും ആധാറും തമ്മിൽ ബന്ധിപ്പിക്കുക എന്നതാണ്. ഇതിനായി 1,000 രൂപ പിഴയായി അടയ്ക്കേണ്ടതുണ്ട്. ഫീസ് അടച്ച് ലിങ്കിംഗ് അപേക്ഷ സമർപ്പിച്ചു കഴിഞ്ഞാൽ, നടപടികൾ പൂർത്തിയാകുന്ന മുറയ്ക്ക് നിങ്ങളുടെ പാൻ കാർഡ് വീണ്ടും സജീവമാകും. അതുവരെ സാധാരണ ഇടപാടുകൾക്കായി പാൻ കാർഡ് ഉപയോഗിക്കാൻ കഴിയില്ല.(Photo: Pexels)

ആധാറുമായി ബന്ധിപ്പിക്കാത്ത പക്ഷം, ആദായനികുതി നിയമത്തിലെ റൂൾ 114AAA അനുസരിച്ചാണ് ഒരു പാൻ കാർഡ് പ്രവർത്തനരഹിതമായി പ്രഖ്യാപിക്കപ്പെടുന്നത്. ഇതോടെ ആദായനികുതി നിയമപ്രകാരമുള്ള പല സുപ്രധാന കാര്യങ്ങൾക്കും ഈ പാൻ കാർഡ് അസാധുവായി കണക്കാക്കപ്പെടും. ബാങ്കുകളിൽ വലിയ തുകകൾ നിക്ഷേപിക്കുന്നതിനോ പിൻവലിക്കുന്നതിനോ തടസ്സമുണ്ടാകാം. ബാങ്ക് അക്കൗണ്ടുകളിലെ കെവൈസി അപൂർണ്ണമായി കണക്കാക്കപ്പെടും. ഓഹരികൾ വാങ്ങുന്നതിനോ വിൽക്കുന്നതിനോ, മ്യൂച്വൽ ഫണ്ട് നിക്ഷേപങ്ങൾക്കോ നിലവിലുള്ള പാൻ കാർഡ് ഉപയോഗിക്കാൻ കഴിയില്ല. ഇത് നിങ്ങളുടെ നിക്ഷേപ പ്രക്രിയകളെ ദോഷകരമായി ബാധിക്കും. പാൻ കാർഡ് നിർബന്ധമായുള്ള എല്ലാ സാമ്പത്തിക അപേക്ഷകളും പ്രോസസ്സ് ചെയ്യുന്നതിൽ വലിയ കാലതാമസമോ നിരസിക്കപ്പെടലോ ഉണ്ടായേക്കാം. (Photo: Shutterstock)

പാൻ കാർഡ് പ്രവർത്തനരഹിതമായാൽ ആദായനികുതിയുമായി ബന്ധപ്പെട്ട നിങ്ങളുടെ എല്ലാ ഇടപാടുകളും പ്രതിസന്ധിയിലാകും. ആദായനികുതി റിട്ടേണുകൾ സമർപ്പിക്കാൻ സാധിക്കില്ല. പാനും ആധാറും ബന്ധിപ്പിക്കാതെ സമർപ്പിക്കുന്ന റിട്ടേണുകൾ അസാധുവായി കണക്കാക്കപ്പെടും. നിങ്ങൾക്ക് സർക്കാരിൽ നിന്ന് ലഭിക്കാനുള്ള ടാക്‌സ് റീഫണ്ടുകൾ ലഭിക്കില്ല. ലിങ്കിംഗ് പ്രക്രിയ പൂർത്തിയാക്കി പാൻ സജീവമാക്കുന്നത് വരെ ഇത്തരം റീഫണ്ടുകൾ ബ്ലോക്ക് ചെയ്യപ്പെടും. ആദായനികുതി നിയമത്തിലെ സെക്ഷൻ 206AA, 206CC എന്നിവ പ്രകാരം, പാൻ കാർഡ് അസാധുവായ വ്യക്തികളിൽ നിന്ന് സാധാരണയേക്കാൾ വളരെ ഉയർന്ന നിരക്കിൽ നികുതി (TDS/TCS) ഈടാക്കും. സാധാരണഗതിയിൽ ഇത് 20% വരെയോ അതിൽ കൂടുതലോ ആകാം. റീഫണ്ടുകൾ വൈകുന്നത് വഴി നിങ്ങൾക്ക് ലഭിക്കേണ്ട പലിശയും നഷ്ടപ്പെടാൻ സാധ്യതയുണ്ട്.(Photo: Pexels)

സെക്ഷൻ 234H പ്രകാരം പാൻ ആധാറുമായി ബന്ധിപ്പിക്കുന്നതിന് നിലവിൽ 1,000 രൂപ പിഴ (Late fee) നൽകേണ്ടതുണ്ട്. ഇത് ലിങ്കിംഗ് പ്രക്രിയ പൂർത്തിയാക്കാൻ നിർബന്ധമായും നൽകേണ്ട തുകയാണ്. സെക്ഷൻ 139AA പ്രകാരം  ആധാർ കാർഡ് എടുക്കാൻ അർഹതയുള്ള എല്ലാ പാൻ കാർഡ് ഉടമകളും അത് പരസ്പരം ബന്ധിപ്പിച്ചിരിക്കണം എന്ന് ആദായനികുതി നിയമത്തിലെ സെക്ഷൻ 139AA വ്യക്തമാക്കുന്നു. പാൻ അസാധുവാകുന്നതുമൂലം ആദായനികുതി റിട്ടേൺ (ITR) കൃത്യസമയത്ത് ഫയൽ ചെയ്യാൻ സാധിക്കില്ല. ഇത് ഐടിആർ ഫയൽ ചെയ്യുന്നതിലെ കാലതാമസത്തിന് കാരണമാവുകയും, അതുവഴി സെക്ഷൻ 234F പ്രകാരമുള്ള അധിക പിഴയും പലിശയും  നൽകേണ്ടി വരികയും ചെയ്യും.(Photo: Instagram)

പാൻ കാർഡ് കൈവശമുള്ള എല്ലാ വ്യക്തികളും ആധാറുമായി ബന്ധിപ്പിക്കണമെന്നത് നിയമമാണെങ്കിലും, ഇതിൽ ചിലർക്ക് ഇളവുകൾ അനുവദിച്ചിട്ടുണ്ട്. പ്രവാസികൾ, 80 വയസ്സോ അതിൽ കൂടുതലോ പ്രായമുള്ളവർ, ആസാം, മേഘാലയ, ജമ്മു കശ്മീർ എന്നീ സംസ്ഥാനങ്ങളിൽ താമസിക്കുന്നവർ എന്നിവർക്കാണ് ഇളവ്. (Photo: ANI)

നിങ്ങളുടെ വാർഷിക വരുമാനം നികുതി നൽകേണ്ട പരിധിക്ക് (Taxable limit) താഴെയാണെങ്കിലും പാൻ കാർഡും ആധാറും കൈവശമുണ്ടെങ്കിൽ അവ തമ്മിൽ ലിങ്ക് ചെയ്യേണ്ടത് നിർബന്ധമാണ്. സ്വന്തമായി വരുമാനമില്ലാത്തവരും തങ്ങളുടെ പേരിലുള്ള പാൻ കാർഡ് ആധാറുമായി ബന്ധിപ്പിക്കണം. ഭാവിയിൽ ഏതെങ്കിലും തരത്തിലുള്ള നിക്ഷേപങ്ങൾ തുടങ്ങാനോ അല്ലെങ്കിൽ ജോലിയിൽ പ്രവേശിക്കാനോ തീരുമാനിക്കുമ്പോൾ പാൻ കാർഡ് 'ആക്ടീവ്' ആയിരിക്കേണ്ടത് അത്യാവശ്യമാണ്. ഇപ്പോൾ ലിങ്ക് ചെയ്തില്ലെങ്കിൽ പിന്നീട് എപ്പോഴെങ്കിലും പാൻ കാർഡ് ആവശ്യമായി വരുമ്പോൾ അത് അസാധുവായ നിലയിലായിരിക്കും. അത് വീണ്ടും സജീവമാക്കാൻ അന്ന് വലിയ തുക പിഴയായോ മറ്റ് നിയമതടസ്സങ്ങളായോ നേരിടേണ്ടി വരും.(Photo: Paytm)

പാൻ കാർഡിലെയും ആധാറിലെയും പേരിന്റെ സ്‌പെല്ലിംഗിൽ വ്യത്യാസമുണ്ടെങ്കിൽ ലിങ്കിംഗ് നടക്കില്ല. രണ്ട് രേഖകളിലും ജനനത്തീയതി ഒന്നുതന്നെയായിരിക്കണം. വർഷത്തിലോ തീയതിയിലോ മാറ്റമുണ്ടെങ്കിൽ ലിങ്കിംഗ് പരാജയപ്പെടും. പാനിലും ആധാറിലും രേഖപ്പെടുത്തിയിരിക്കുന്ന ലിംഗഭേദത്തിൽ മാറ്റമുണ്ടായാലും ലിങ്കിംഗ് സാധ്യമാകില്ല. വിവരങ്ങളിൽ മാറ്റമുണ്ടെങ്കിൽ അവ ആദ്യം തിരുത്തേണ്ടത് അത്യാവശ്യമാണ്.. (Photo: Paytm)

പാൻ കാർഡിലെ വിവരങ്ങളിൽ തെറ്റുണ്ടെങ്കിൽ അത് തിരുത്താൻ NSDL (Protean) അല്ലെങ്കിൽ UTIITSL വെബ്‌സൈറ്റുകൾ വഴി അപേക്ഷിക്കാം. ആധാറിലെ വിവരങ്ങളാണ് തിരുത്തേണ്ടതെങ്കിൽ നിങ്ങൾക്ക് രണ്ട് വഴികളുണ്ട്‌.  നിങ്ങളുടെ മൊബൈൽ നമ്പർ ആധാറുമായി ബന്ധിപ്പിച്ചിട്ടുണ്ടെങ്കിൽ, UIDAI വെബ്‌സൈറ്റിൽ കയറി പേര്, ജനനത്തീയതി എന്നിവ ഓൺലൈനായി മാറ്റാൻ അപേക്ഷിക്കാം. അല്ലെങ്കിൽ നിങ്ങളുടെ അടുത്തുള്ള ആധാർ എൻറോൾമെന്റ് സെന്റർ സന്ദർശിച്ച് നേരിട്ടും തിരുത്തലുകൾ വരുത്താം. ഇതിനായി റേഷൻ കാർഡ്, വോട്ടർ ഐഡി തുടങ്ങിയ സപ്പോർട്ടിംഗ് ഡോക്യുമെന്റുകൾ കൈവശം കരുതണം. (Photo: Pexels)

ഒരാളുടെ വാർഷിക വരുമാനം നികുതി നൽകേണ്ട പരിധിക്ക് താഴെയാണെങ്കിലും, പാൻ-ആധാർ ലിങ്കിംഗ് നിർബന്ധമാണ്. നികുതി അടയ്ക്കാത്തതുകൊണ്ട് ലിങ്ക് ചെയ്യേണ്ടതില്ല എന്ന ധാരണ തെറ്റാണ്. പാൻ കാർഡ് പ്രവർത്തനക്ഷമമായി നിലനിർത്താൻ ആധാറുമായി ബന്ധിപ്പിക്കുക എന്നതല്ലാതെ മറ്റ് വഴികളൊന്നുമില്ല. ഒരിക്കൽ പാൻ അസാധുവായാൽ, ലിങ്കിംഗ് നടപടികൾ പൂർത്തിയാക്കിയാൽ മാത്രമേ അത് വീണ്ടും ഉപയോഗിക്കാൻ സാധിക്കൂ.(Photo: Official website/ uidai.gov.in)

പാൻ കാർഡും ആധാറും തമ്മിൽ ബന്ധിപ്പിക്കുന്നതിനുള്ള നടപടിക്രമങ്ങൾ വളരെ ലളിതമാണ്. വീട്ടിലിരുന്ന് തന്നെ ഇന്റർനെറ്റ് സഹായത്തോടെ മിനിറ്റുകൾക്കുള്ളിൽ ഇത് പൂർത്തിയാക്കാം. ആദായനികുതി വകുപ്പിന്റെ ഇ-ഫൈലിംഗ് പോർട്ടലിൽ () പ്രവേശിക്കുക. ഹോം പേജിലെ 'Quick Links' എന്ന വിഭാഗത്തിന് താഴെയുള്ള 'Link Aadhaar' എന്ന ഓപ്ഷൻ തിരഞ്ഞെടുക്കുക. നിങ്ങളുടെ പാൻ നമ്പറും ആധാർ നമ്പറും കൃത്യമായി രേഖപ്പെടുത്തുക. ആധാറുമായി ബന്ധിപ്പിച്ച മൊബൈൽ നമ്പറിലേക്ക് ഒരു വൺ ടൈം പാസ്വേഡ് (OTP) വരും. ഇത് വെബ്‌സൈറ്റിൽ നൽകി വിവരങ്ങൾ ശരിയാണെന്ന് ഉറപ്പുവരുത്തുക. ലിങ്കിംഗ് വൈകിയതിനുള്ള പിഴയായ 1,000 രൂപ അടയ്ക്കുന്നതിനായി 'e-Pay Tax' എന്ന പേജിലേക്ക് നിങ്ങൾ എത്തും. അവിടെ നൽകിയിരിക്കുന്ന നിർദ്ദേശങ്ങൾ പാലിച്ച് ഓൺലൈനായി പണമടയ്ക്കുക. പണമടച്ച ശേഷം വീണ്ടും 'Link Aadhaar' പേജിലെത്തി വിവരങ്ങൾ നൽകി അപേക്ഷ പൂർത്തിയാക്കുക. അപേക്ഷ സമർപ്പിച്ചു കഴിഞ്ഞാൽ കുറച്ച് ദിവസങ്ങൾക്കുള്ളിൽ നിങ്ങളുടെ പാൻ കാർഡും ആധാറും തമ്മിൽ വിജയകരമായി ബന്ധിപ്പിക്കപ്പെടും. ഇതിന്റെ സ്റ്റാറ്റസ് ഇതേ വെബ്‌സൈറ്റിലെ 'Link Aadhaar Status' എന്ന ഓപ്ഷൻ വഴി പിന്നീട് പരിശോധിക്കാവുന്നതുമാണ്. (Photo: Instagram/@proteantechnologies)

പാൻ കാർഡും ആധാറും ബന്ധിപ്പിക്കാനുള്ള സമയപരിധി അവസാനിക്കാൻ ഇനി മണിക്കൂറുകൾ മാത്രമാണ് ബാക്കിയുള്ളത്. ഈ നടപടിക്രമം പൂർത്തിയാക്കാത്ത പക്ഷം നിങ്ങളുടെ സാമ്പത്തിക സുരക്ഷിതത്വത്തെ ബാധിക്കുന്ന ഗുരുതരമായ പ്രത്യാഘാതങ്ങൾ ഉണ്ടാകുമെന്നാണ് അധികൃതർ നല്കുന്ന മുന്നറിയിപ്പ്. (Photo: Pexels)