Mammootty | ദേ മമ്മൂക്ക പിന്നേം ! സോഷ്യല്‍ മീഡിയയില്‍ തരംഗമായി മമ്മൂട്ടിയുടെ ചുള്ളന്‍ ലുക്ക്

അഭിനയത്തിന്‍റെ കാര്യത്തില്‍ മാത്രമല്ല ലുക്കിലും ഡ്രസിങ് സെന്‍സിലും മമ്മൂക്കയെ തോല്‍പ്പിക്കാനാവില്ല മക്കളെ എന്ന് വെറുതെ പറയുന്നതല്ല. സോഷ്യല്‍ മീഡിയയിലൂടെ താരം പങ്കുവെക്കുന്ന ഓരോ ചിത്രങ്ങളും അദ്ദേഹത്തിന്‍റെ ഫാഷന്‍ സെന്‍സ് എടുത്ത് കാണിക്കുന്നതാണ്.

കറുത്ത ഫുള്‍ സ്ലീവ് ഷര്‍ട്ടിനൊപ്പം ആഷ് കളര്‍ പാന്‍റും ധരിച്ച് കൂള്‍ ലുക്കില്‍ നില്‍ക്കുന്ന മമ്മൂട്ടിയുടെ ചിത്രങ്ങളാണ് ഇപ്പോള്‍ വൈറലായിരിക്കുന്നത്. നടനും ഫോട്ടോഗ്രാഫറും ദുല്‍ഖര്‍ സല്‍മാന്‍റെ അടുത്ത സുഹൃത്തുമായ ഷാനി ഷാക്കിയാണ് മമ്മൂക്കയുടെ ഈ കിടിലന്‍ ചിത്രങ്ങള്‍ പകര്‍ത്തിയിരിക്കുന്നത്.

അടുത്തിടെ ദുല്‍ഖറിന്‍റെ പിറന്നാള്‍ ദിനത്തില്‍ മമ്മൂട്ടി പങ്കുവെച്ച ചിത്രങ്ങളും വൈറലായിരുന്നു. 'World Nature Conservation Day' എന്ന അടിക്കുറിപ്പോടെ ഇന്‍സ്റ്റഗ്രാമിലാണ് ചിത്രങ്ങൾ പോസ്റ്റ് ചെയ്തിരിക്കുന്നത്.

മകന്റെ പിറന്നാളായിട്ട് അറ്റൻഷൻ മൊത്തം നിങ്ങളു കൊണ്ടുപോയല്ലോ എന്നാണ് ആരാധകർ ചിത്രത്തിനു താഴെ കമന്റ് ചെയ്തത്..

സിനിമ സെറ്റിലും വിദേശയാത്രകളിലും ഫോട്ടോഗ്രാഫറുടെ റോളിലും മമ്മൂട്ടി എത്താറുണ്ട്. പ്രിയതാരത്തിന്‍റെ ഫ്രെയിമില്‍ ഇടം നേടാന്‍ സൂപ്പര്‍ താരങ്ങള്‍ മുതല്‍ യുവതാരങ്ങള്‍ വരെ മത്സരിക്കും

കൊല്ലം എത്ര കഴിഞ്ഞാലും മമ്മൂട്ടിയിലെ പ്രതിഭാശാലിയായ നടന് ഒരു ഇടിവും വന്നിട്ടില്ല എന്ന് തെളിയിക്കുന്നതായിരുന്നു ഇക്കഴിഞ്ഞ സംസ്ഥാന ചലച്ചിത്ര പുരസ്കാരം.

ലിജോ ജോസ് പെല്ലിശ്ശേരി സംവിധാനം ചെയ്ത ‘നൻപകൽ നേരത്ത് മയക്കം’ എന്ന ചിത്രത്തിലൂടെ മികച്ച നടനുള്ള പുരസ്കാരം വീണ്ടും അദ്ദേഹത്തെ തേടിയെത്തി.

ജ്യോതിക നായികയായെത്തുന്ന ജിയോ ബേബി ചിത്രം കാതല്‍, കണ്ണൂര്‍ സ്ക്വാഡ്, ബസൂക്ക തുടങ്ങി നിരവധി സിനിമകളാണ് മമ്മൂട്ടിയുടെതായി അണിയറയില്‍ ഒരുങ്ങുന്നത്