ദുൽഖറിന്റെ 'സീത' ഇനി വിജയിയുടെ നായിക; ദേവരകൊണ്ട ചിത്രത്തിൽ നായികയായി മൃണാൽ താക്കൂർ

വിജയ് ദേവരകൊണ്ടയുടെ പുതിയ ചിത്രത്തിൽ നായികയായി മൃണാൽ താക്കൂർ. സിനിമയുടെ പൂജ ഇന്ന് ഹൈദരാബാദിൽ വെച്ച് നടന്നു.

മൃണാലിന്റെ മൂന്നാമത്തെ തെലുങ്ക് ചിത്രമാണിത്. ദുൽഖർ സൽമാനൊപ്പം അഭിനയിച്ച സീതാരാമം തെലുങ്കിൽ സൂപ്പർ ഹിറ്റായിരുന്നു.

നാനിക്കൊപ്പം മറ്റൊരു തെലുങ്ക് ചിത്രത്തിലും മൃണാൽ നായികയാകുന്നുണ്ട്. ആദ്യമായാണ് വിജയ് ദേവരകൊണ്ടയും മൃണാലും ഒന്നിക്കുന്നത്.

പുതിയ ചിത്രത്തിന് പേര് തീരുമാനിച്ചിട്ടില്ല. ചിത്രത്തിന്റെ ഷൂട്ടിങ് ഉടൻ ആരംഭിക്കുമെന്നാണ് അണിയറപ്രവർത്തകർ അറിയിച്ചിരിക്കുന്നത്.

പരശുറാം പെട്ലയാണ് ചിത്രം സംവിധാനം ചെയ്യുന്നത്. ശ്രീ വെങ്കിടേശ്വര ക്രിയേഷൻസാണ് ചിത്രം നിർമിക്കുന്നത്.

സീതാരാമത്തിനു ശേഷം മലയാളത്തിലടക്കം നിരവധി ആരാധകരുള്ള നായികയാണ് മൃണാൽ താക്കൂർ. നിലവിൽ ബോളിവുഡിലും തെന്നിന്ത്യൻ ചിത്രത്തിലും സജീവ സാന്നിധ്യമാണ് താരം.

നെറ്റ്ഫ്ലിക്സിൽ ലസ്റ്റ് സ്റ്റോറീസ് 2 ആണ് മൃണാലിന്റെ ഇനി പുറത്തിറങ്ങാനുള്ള ചിത്രം. നീന ഗുപ്ത, കാജോൾ, തമന്ന, തിലോത്തമ ഷോം, കൊങ്കണ സെൻ ശർമ, വിജയ് വർമ തുടങ്ങിയവരും ലസ്റ്റ് സ്റ്റോറീസിലുണ്ട്.

അതേസമയം, ലൈഗറിന്റെ പരാജയത്തിനു ശേഷം ഗംഭീര തിരിച്ചുവരവിനുള്ള ഒരുക്കത്തിലാണ് വിജയ് ദേവരകൊണ്ട. സാമന്തയ്ക്കൊപ്പം ഖുഷിയാണ് താരത്തിന്റെ ഇനി പുറത്തിറങ്ങാനുള്ള ചിത്രം.