'ഹിമാലയത്തിൽ വെച്ച് ആ മനുഷ്യൻ റോസിനെ തിരിച്ചറിഞ്ഞപ്പോൾ'; മറക്കാനാകാത്ത നിമിഷത്തെ കുറിച്ച് ടൈറ്റാനിക് നായിക

ശ്രദ്ധേയമായ നിരവധി സിനിമകളിൽ അഭിനയിച്ചിട്ടുണ്ടെങ്കിലും കെയ്റ്റ് വിന്‍സ്‌ലെറ്റ് എന്ന ഹോളിവുഡ് നടിയെ സാധാരണ ജനങ്ങൾ ഓർക്കുക ടൈറ്റാനിക്കിലെ റോസ് എന്ന നായികയായിട്ടാകും.

വർഷങ്ങൾക്കു മുമ്പ് ഇന്ത്യാ സന്ദർശനത്തിനിടെ ഉണ്ടായ ഇത്തരം ഒരു അനുഭവം പറയുകയാണ് കെയ്റ്റ്.

ടൈറ്റാനിക്ക് എന്ന സിനിമ എത്രമാത്രം ജനങ്ങളിൽ സ്വാധീനമുണ്ടാക്കി എന്ന് വ്യക്തമാകുന്ന അനുഭവമാണ് കെയ്റ്റ് പങ്കുവെച്ചത്.

"വർഷങ്ങൾക്ക് മുമ്പ് ഇന്ത്യ സന്ദർശനത്തിനിടെയായിരുന്നു മറക്കാനാകാത്ത അനുഭവമുണ്ടായത്. ഹിമാലയത്തിന്റെ താഴ് വരയിലൂടെ നടന്നു പോവുകായിരുന്നു ഞാൻ"- കെയ്റ്റ് പറയുന്നു

"ഞാൻ തനിച്ചായിരുന്നു. എനിക്ക് എതിർവശത്തു നിന്നും പ്രായമായ ഒരാൾ വടിയും കുത്തി നടന്നു വരുന്നുണ്ട്. കുറഞ്ഞത് 85 വയസ്സെങ്കിലും അദ്ദേഹത്തിന് പ്രായമുണ്ടാകും.

"എന്നെ കണ്ടതും അയാൾ കുറച്ച് നേരം നോക്കി നിന്നു. നിങ്ങൾ ടൈറ്റാനിക്കിലെ... അദ്ദേഹം ചോദിച്ചു. ഞാൻ പറഞ്ഞു അതേ, സ്വന്തം കൈ ഹൃദയത്തോട് ചേർത്ത് അദ്ദേഹം പറഞ്ഞു, നന്ദി"

"സന്തോഷം കൊണ്ട് കണ്ണ് നിറഞ്ഞു പോയ അനുഭവമായിരുന്നു അത്. സിനിമ ആളുകളിൽ എത്ര മാത്രം ഇറങ്ങിച്ചെല്ലുന്നു എന്ന് തിരിച്ചറിഞ്ഞ നിമിഷം"- കെയ്റ്റ് പറയുന്നു.

ഒരു മാഗസിന് നൽകിയ അഭിമുഖത്തിലാണ് കെയ്റ്റ് അനുഭവത്തെ കുറിച്ച് പറഞ്ഞത്.

1997 ലാണ് ജെയിംസ് കാമറൂൺ സംവിധാനം ചെയ്ത ടൈറ്റാനിക് പുറത്തിറങ്ങുന്നത്. ടൈറ്റാനിക് കപ്പലിന്റെ ദുരന്തത്തെ ആസ്പദമാക്കി എടുത്ത ചിത്രം ജാക്കിന്റേയും റോസിന്റേയും പ്രണയ കഥയായി അറിയപ്പെട്ടത് പിന്നീടുണ്ടായ ചരിത്രം.

ഇന്നും ജാക്കിനേയും റോസിനേയും വേദനയോടെയല്ലാതെ സിനിമാ പ്രേമികൾക്ക് ഓർക്കാനാകില്ല. ലിയനാഡോ ഡികാപ്രിയോയും കെയ്റ്റ് വിന്‍സ്‌ലെറ്റുമാണ് പ്രധാന വേഷത്തിലെത്തിയത്. (Image: Instagram)

ചിത്രത്തിന്റെ കഥയും തിരക്കഥയും ഒരുക്കിയത് ജെയിംസ് കാമറൂൺ തന്നെയായിരുന്നു. (Image: Instagram)