തെങ്കാശിയിൽ സ്വകാര്യ ബസുകൾ കൂട്ടിയിടിച്ച് 7 മരണം; 60 ഓളംപേര്‍ക്ക് പരിക്ക്

തെങ്കാശിയിൽ രണ്ട് സ്വകാര്യ ബസുകൾ കൂട്ടിയിടിച്ച് ഏഴുപേർ മരിച്ചു. 60ഓളം പേര്‍ക്ക് പരിക്കേറ്റു. ഏഴുപേരുടെ നില ഗുരുതരമാണെന്നാണ് വിവരം. തെങ്കാശി ജില്ലയിൽ ഇടയ്ക്കലിന് സമീപം ദുരൈസാമിയാപുരം ഭാഗത്ത് ഇന്ന് രാവിലെയായിരുന്നു അപകടം.

തിരുമലക്കോവിലിൽ നിന്ന് കോവിൽപട്ടിയിലേക്ക് പോയ എം ആർ ഗോപാലൻ എന്ന സ്വകാര്യ ബസും രാജപാളയത്തിൽ നിന്ന് തെങ്കാശിയിലേക്ക് വന്ന കെ എസ് ആർ എന്ന സ്വകാര്യ ബസും നേർക്കുനേർ വന്ന് ഇടിച്ചാണ് അപകടമുണ്ടായത്

പരിക്കേറ്റ യാത്രക്കാരെ തെങ്കാശി സർക്കാർ ആശുപത്രിയിലേക്ക് മാറ്റി. ഗുരുതരമായി പരിക്കേറ്റ ഏഴുപേരെ വിദഗ്ധ ചികിത്സയ്ക്കായി മെഡിക്കൽ കോളേജിലേക്ക് മാറ്റിയിട്ടുണ്ട്. സംഭവവുമായി ബന്ധപ്പെട്ട് ഇലത്തൂർ പോലീസ് കേസെടുത്ത് അന്വേഷണം ആരംഭിച്ചു

അപകടത്തിൽപ്പെട്ട ബസുകളുടെ പെർമിറ്റ് ഗതാഗത വകുപ്പ് ഉദ്യോഗസ്ഥർ റദ്ദാക്കി. അപകടം നടന്ന സ്ഥലത്ത് തെങ്കാശി ജില്ലാകളക്ടർ കമൽകിഷോർ, ജില്ലാ പോലീസ് മേധാവി അരവിന്ദ് എന്നിവർ പരിശോധന നടത്തി.

ഇടിയുടെ ആഘാതത്തിൽ രണ്ടു ബസുകളും പൂർണമായും തകർന്നു. അഗ്നിശമന സേനയുടെ നേതൃത്വത്തിലാണ് രക്ഷാപ്രവർത്തനം നടത്തിയത്. മരണസംഖ്യ ഉയരാൻ സാധ്യതയുണ്ടെന്നും പ്രാദേശിക മാധ്യമങ്ങൾ റിപ്പോർട്ട് ചെയ്തു.

ആശുപത്രിയിൽ ചികിത്സയിൽ കഴിയുന്നവരെ ജില്ലാ കളക്ടറും ജില്ലാ പോലീസ് മേധാവിയും സന്ദർശിച്ചു. വിവിധ രാഷ്ട്രീയ പാർട്ടി നേതാക്കളും പരിക്കേറ്റവരെ ആശുപത്രിയിലെത്തി കണ്ടു.

അശ്രദ്ധമായി വാഹനമോടിച്ചതാണ് അപകട കാരണമെന്ന് പ്രാഥമിക അന്വേഷണത്തിൽ വ്യക്തമായതായി തെങ്കാശി പോലീസ് അറിയിച്ചു. തമിഴ്‌നാട് മുഖ്യമന്ത്രി എം കെ സ്റ്റാലിൻ മരിച്ചവരുടെ കുടുംബങ്ങളെ അനുശോചനം അറിയിച്ചു.