ലോക്ഡൗൺ കാലത്തും റോഡിൽ അശ്രദ്ധ; 40 ദിവസത്തിൽ മരിച്ചത് 64 പേർ

തിരുവനന്തപുരം: വാഹനങ്ങൾക്ക് കർശന നിയന്ത്രണമുള്ള ലോക്ക്ഡൌൺ കാലത്തും നിരത്തുകളിൽ അപകടങ്ങൾക്ക് കുറവൊന്നുമില്ല. 40 ദിവസത്തിനിടെ കേരളത്തിലുണ്ടായ അപകടങ്ങളിൽ 64 പേരാണ് മരിച്ചത്.

സംസ്ഥാന ക്രൈം റെക്കോർഡ്സ് ബ്യൂറോയുടെ സഹായത്തോടെ റോഡ് സുരക്ഷാ അതോറിറ്റി തയ്യാറാക്കിയ കണക്കിലാണ് ഇക്കാര്യമുള്ളത്.

അപകടങ്ങളുടെ കാര്യത്തിൽ 90 ശതമാനം കുറവുണ്ടായെങ്കിലും വാഹനങ്ങൾ റോഡിൽ വളരെ കുറഞ്ഞ സമയത്തും അറുപതിലേറെ ജീവനുകളാണ് നിരത്തുകളിൽ പൊലിഞ്ഞത്.

ലോക്ക്ഡൌൺ കാലത്തുപോലും ഇത്രയധികം അപകടങ്ങൾ സംഭവിക്കുന്നത് ഗുരുതരമായ പ്രശ്നമാണെന്ന് റോഡ് സുരക്ഷാ അതോറിറ്റി വിലയിരുത്തുന്നു.

കോവിഡ് വ്യാപനത്തെ തുടർന്നുള്ള ലോക്ക്ഡൌൺ ഏർപ്പെടുത്തിയ ആദ്യ രണ്ടു ഘട്ടങ്ങളിലെ 40 ദിവസത്തിനുള്ളിൽ 483 അപകടങ്ങളാണുണ്ടായത്. ഇതിൽ 482 പേർക്ക് പരിക്കേറ്റു.

കഴിഞ്ഞ വർഷം ഇതേ കാലയളവിൽ 565 പേർ റോഡപകടങ്ങളിൽ മരിച്ചിരുന്നു. 4437 അപകടങ്ങളാണ് ഉണ്ടായത്. ഇതിൽ 5005 പേർക്ക് പരിക്കേറ്റിരുന്നു.