കോയമ്പത്തൂരില്‍ പ്രചാരണറാലിയ്ക്കിടെ മരത്തില്‍നിന്ന് നടൻ വിജയ്‌യുടെ വാഹനത്തിലേക്ക് ചാടി ആരാധകന്‍; വീഡിയോ വൈറൽ

കോയമ്പത്തൂരില്‍ നടൻ വിജയ്‍യുടെ രാഷ്ട്രീയ പ്രചാരണറാലിയ്ക്കിടെ വഴിയരികിലെ മരത്തിൽ നിന്ന് അദ്ദേഹത്തിന്റെ വാഹനത്തിലേക്ക് എടുത്തുചാടി ആരാധകന്‍. സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ വൈറലാണ്. ശനിയാഴ്ച്ച തന്റെ പാർട്ടിയായ തമിഴക വെട്രി കഴകത്തിന് (ടിവികെ) വേണ്ടി പ്രചാരണം നടത്തുകയായിരുന്ന വിജയ് , വലിയൊരു ജനക്കൂട്ടവുമായി സംവദിക്കുന്നതിനിടെയാണ് അപ്രതീക്ഷിത സംഭവം നടന്നത്. വിജയ് ജനക്കൂട്ടത്തെ കൈവീശി കാണിക്കുന്നതും ഇതിനിടയിൽ ആരാധകൻ മരത്തിൽ നിന്ന് ചാടുന്നതും ദൃശ്യങ്ങളിൽ കാണാം. ഒന്ന് ഞെട്ടിയ വിജയ് ഉടൻ തന്നെ ആരാധകനെ എഴുന്നേൽക്കാൻ സഹായിക്കുന്നുണ്ട്. കൂടാതെ, നടൻ പാര്‍ട്ടി നിറങ്ങളിലുള്ള ഒരു ഷാള്‍ ആരാധകന് നൽകി. എന്നാല്‍ ഇതോടെ മറ്റൊരു ആരാധകനും അദ്ദേഹത്തെ കാണാന്‍ വാഹനത്തില്‍ വലിഞ്ഞുകയറാന്‍ ശ്രമം നടത്തി. കൂടുതല്‍ പേര്‍ വാഹനത്തില്‍ കയറുന്നത് തടയാന്‍ അദ്ദേഹത്തിന്റെ സുരക്ഷാ ഉദ്യോഗസ്ഥര്‍ ശ്രമിക്കുന്നതിനിടെ വിജയ് വാഹനത്തിനുള്ളിലേക്ക് പോകുന്നതും ദൃശ്യങ്ങളില്‍ കാണാൻ സാധിക്കും. സണ്‍ ന്യൂസാണ് സംഭവത്തിന്റെ ദൃശ്യങ്ങൾ പകർത്തിയത്.