NDA, UDF സ്ഥാനാർത്ഥികൾക്ക് വോട്ട് ചോദിച്ച് അരുൺ ഗോപി; വോട്ടെല്ലാം സ്ഥാനാർത്ഥികൾക്കും തെറിയെല്ലാം അരുൺ ഗോപിക്കെന്നും ശ്രീജിത്ത് പണിക്കർ

എന്നാൽ, എൻ ഡി എ സ്ഥാനാർത്ഥിക്ക് വോട്ട് ചോദിച്ചത് ചിലരെ ചൊടിപ്പിച്ചു. അതു മാത്രമല്ല അരുൺ ഗോപി ഇതിനു മുമ്പ് ഫേസ്ബുക്കിൽ പങ്കുവച്ച ചില പോസ്റ്റുകളും ചർച്ചയായി. ചീത്ത വിളികളുമായി ചിലർ എത്തിയപ്പോൾ എല്ലാ പാർട്ടിയിൽ ഉള്ളവരെയും പ്രോത്സാഹിപ്പിക്കുന്നത് തന്നെ വലിയ കാര്യമെന്ന് ആയിരുന്നു ഒരാളുടെ കമന്റ്.

എൻ ഡി എ സ്ഥാനാർത്ഥിക്ക് വോട്ട് അഭ്യർത്ഥിച്ചുള്ള പോസ്റ്റിന് തൊട്ടുമുമ്പ് ഫേസ്ബുക്കിൽ അരുൺ ഗോപി പങ്കുവച്ചിരിക്കുന്നത് മുഖ്യമന്ത്രി പിണറായി വിജയനെ അഭിനന്ദിച്ചു കൊണ്ടുള്ള ഒരു പോസ്റ്റ് ആയിരുന്നു. ഗെയിൽ പദ്ധതി യാഥാർത്ഥ്യമായതിന് ആയിരുന്നു മുഖ്യമന്ത്രിക്ക് അരുൺ ഗോപിയുടെ അഭിനന്ദനം.

ഇതിനെല്ലാം മുമ്പ് പഞ്ചായത്ത് തെരഞ്ഞെടുപ്പിൽ മത്സരിക്കുന്ന സ്നേഹ ആർ വി ഹരിപ്പാടിനു വേണ്ടിയും അരുൺ ഗോപി വോട്ട് അഭ്യർത്ഥന നടത്തിയിരുന്നു. കെ എസ് യു സംസ്ഥാന വൈസ് പ്രസിഡന്റ് കൂടിയായ സ്നേഹ ആർ വി ഹരിപ്പാട് ബ്ലോക്ക് പഞ്ചായത്തിലേക്ക് ചെറുതന ഡിവിഷനിൽ നിന്നാണ് മത്സരിക്കുന്നത്. ഏതായാലും ആദ്യത്തെ രണ്ട് പോസ്റ്റുകൾക്കും ലഭിക്കാത്ത തരത്തിലുള്ള ചീത്ത വിളികൾ ആയിരുന്നു എൻ ഡി എ സ്ഥാനാർത്ഥിക്ക് വോട്ട് അഭ്യർത്ഥിച്ചപ്പോൾ കമന്റ് ബോക്സിൽ നിറഞ്ഞത്.

ഇതെല്ലാം കണ്ട് രാഷ്ട്രീയ നിരീക്ഷകനായ ശ്രീജിത്ത് പണിക്കർ കുറിച്ച ഒരു കമന്റും അരുൺ ഗോപി ഫേസ്ബുക്കിൽ പങ്കുവച്ചു. 'പ്രിയരേ, വരുന്ന തെരഞ്ഞെടുപ്പിൽ നിങ്ങളുടെ വിലയേറിയ സമ്മതിദാനം എൽഡിഎഫ്, യുഡിഎഫ്, ബിജെപി സ്ഥാനാർത്ഥികൾക്കും തെറി മുഴുവൻ അവർക്കു വേണ്ടി വോട്ടു ചോദിക്കുന്ന അരുൺ ഗോപിക്കും നൽകണമേയെന്ന് സ്നേഹത്തിന്റെ ഭാഷയിൽ ഹൃദയം തൊട്ട് അഭ്യർത്ഥിക്കുന്നു' - ശ്രീജിത്ത് പണിക്കരുടെ ഈ കമന്റ് പണിക്കര് അല്ലേലും മാസ് ആണല്ലോ എന്ന കുറിപ്പോടെയാണ് അരുൺ ഗോപി പങ്കുവച്ചത്.