ഫ്രാൻസിൽ കണ്ടെത്തിയ 'വൈറ്റ് ഹൈഡ്രജൻ' ഭൂമിക്ക് അനു​ഗ്രഹമാകുന്നത് എങ്ങനെ?

ഭൂമിയുടെ ഉപരിതലത്തിൽ കാണപ്പെടുന്ന വൈറ്റ് ഹൈഡ്രജനെ​ ​ഗോൾഡ് ഹൈഡ്രജനെന്നും നാച്വറൽ ഹൈഡ്രജനെന്നും അല്ലെങ്കിൽ ജിയോളജിയോ ഹൈഡ്രജൻ എന്നും വിളിക്കാറുണ്ട്. ഇവയുടെ ഉത്പാദന സമയത്ത് ഹരിതഗൃഹ വാതകങ്ങൾ ഉണ്ടാകില്ല. ഹൈഡ്രജൻ കത്തുമ്പോൾ ഉൽപ്പാദിപ്പിക്കുന്നത് വെള്ളമാണ്. അതിനാൽ ഇത് സൗരോർജ്ജത്തെക്കാളും കാറ്റിനെക്കാളും മികച്ച ഹരിത ഊർജ സ്രോതസായും കണക്കാക്കപ്പെടുന്നു.

ഫ്രാൻസിലെ ഖനന മേഖലയായ ലോറെയ്‌നിലുള്ള ഭൂഗർഭ ഉപരിതലത്തിലെ മീഥേൻ സാന്ദ്രത വിലയിരുത്തിയപ്പോഴാണ് ഈ കണ്ടെത്തൽ നടത്തിയത്. ശാസ്ത്രജ്ഞരായ ജാക്വസ് പിറോണനും ഫിലിപ്പ് ഡി ഡൊണാറ്റോയും ആഴത്തിൽ കുഴിച്ചപ്പോൾ വീണ്ടും കൂടുതൽ വൈറ്റ് ഹൈഡ്രജൻ ശേഖരം കണ്ടെത്തി.

ഹരിതോർജ പദ്ധതികളിൽ ഹൈഡ്രജൻ ഉപയോഗിക്കാറുണ്ട്. യുഎസിലെ കൊളോമ, ഓസ്‌ട്രേലിയയിലെ ഗോൾഡ് ഹൈഡ്രജൻ തുടങ്ങിയ സംഘടനകൾ ഹൈഡ്രജന്റെ ഉറവിടങ്ങൾ കണ്ടെത്തുന്നതിനുള്ള ഡ്രില്ലിംഗുകളും നടത്തുന്നുണ്ട്. ഫോസിൽ ഇന്ധനങ്ങൾ ഉപയോ​ഗിക്കുന്നതു മൂലം ഉണ്ടാകുന്ന പാരിസ്ഥിതിക ആഘാതം കുറയ്ക്കുന്നതിന് ഹൈഡ്രജൻ അത്യന്താപേക്ഷിതമാണ്. ഹരിതോർജ വിപണിയെ പൂർണമായും പരിവർത്തനം ചെയ്യാനുള്ള ശേഷിയും ഈ വാതകത്തിനുണ്ട്. വൈറ്റ് ഹൈഡ്രജൻ വിൽക്കുന്നതിനുള്ള സാധ്യതയെക്കുറിച്ച് നിരവധി സ്റ്റാർട്ടപ്പുകൾ ഇപ്പോൾ അന്വേഷണം നടത്തുന്നുണ്ട്. അതിനാൽ ഫ്രാൻസിൽ കണ്ടെത്തിയ ഈ ‘വൈറ്റ് ഹൈഡ്രജൻ’ ശേഖരം ഏറെ പ്രധാന്യം അർഹിക്കുന്നതാണ്.