രഞ്ജിതയെ അവഹേളിച്ച പവിത്രനെതിരെ കഠിനശിക്ഷയ്ക്ക് മന്ത്രി; ഡെപ്യൂട്ടി തഹസിൽദാറെ പിരിച്ചു വിടുന്നതിന്റെ നടപടി ക്രമം 

നിലവിൽ ഇയാളെ 14 ദിവസത്തേക്ക് ഹോസ്ദുർഗ് ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി 1 റിമാൻഡ് ചെയ്തിരിക്കുകയാണ്. എൻഎസ്എസ് ഹോസ്ദുർഗ് താലൂക്ക് പ്രസിഡൻ്റ് പ്രഭാകരൻ കരിച്ചേരിയുടെ പരാതിയിൽ ജാമ്യമില്ലാ വകുപ്പ് പ്രകാരം കേസെടുത്തതിന് പിന്നാലെയാണിത്.24 മണിക്കൂറിൽ അധികം സമയം ​ഗവൺമെന്റ് ഉദ്യോ​ഗസ്ഥൻ‌ പൊലീസ് കസ്റ്റഡിയിൽ ഇരുന്നാൽ ​സർവീസ് ചട്ടമനുസരിച്ച് ജോലിയിൽ നിന്നും പിരിച്ചുവിടാൻ സാധ്യതയേറെയാണ്.

സര്‍വീസില്‍ നിന്നും നീക്കം ചെയ്യുന്നതും സര്‍വീസില്‍ നിന്നും പിരിച്ചു വിടുന്നതും കഠിന ശിക്ഷയില്‍ ഉള്‍പ്പെടുന്നു.

ഒരു ജീവനക്കാരന് എതിരെ കഠിന ശിക്ഷ നടപ്പാക്കുന്നത് അത്ര എളുപ്പമുള്ള നടപടിക്രമമല്ല. ഇവിടെ പവിത്രന്‍ ഗസറ്റഡ് ഉദ്യോഗസ്ഥനല്ല. അതിനാല്‍ ലാന്‍ഡ് റവന്യു കമ്മീഷണര്‍ക്ക് അച്ചടക്ക നടപടി എടുക്കാം. ഗസറ്റഡ് ഉദ്യോഗസ്ഥന് എതിരെ സര്‍ക്കാരാണ് അച്ചടക്ക നടപടി സ്വീകരിക്കുന്നത്.

കുറ്റാരോപിതനെ നേരില്‍ കേള്‍ക്കുന്നതിന് ഒരു ഹിയറിംഗ് ഉദ്യോഗസ്ഥനെ ചുമതലപ്പെടുത്തും. കുറ്റാരോപിതന് നല്‍കിയിരിക്കുന്ന താല്‍ക്കാലിക ശിക്ഷ വ്യക്തമായ കാരണങ്ങളുടെ അടിസ്ഥാനത്തില്‍ ഇളവ് ചെയ്തു നല്‍കുന്നതിന് ഹിയറിംഗ് ഓഫീസര്‍ക്ക് അധികാരമുണ്ട്. ഹിയറിംഗ് കഴിഞ്ഞ ശേഷം മുന്‍ നിശ്ചയിച്ച ശിക്ഷ തന്നെ തീരുമാനിക്കുകകയോ അതില്‍ ഇളവ് നല്‍കുകയോ ചെയ്ത ശേഷം ശിക്ഷ അന്തിമമാക്കുന്നതിന് മുമ്പ് പി എസ് സിയുടെ അനുമതി തേടും. പി എസ് സി യുടെ അനുമതി കിട്ടി കഴിഞ്ഞാല്‍ ശിക്ഷ അന്തിമമാകും.

ഉദ്യോഗസ്ഥൻ സര്‍വീസില്‍ തുടരുന്നതിന് പ്രാപ്തനല്ല എന്നും കർശനമായ നിയമ നടപടികൾ ഉണ്ടാകണമെന്നും കാസർഗോഡ് കളക്ടർ ശുപാർശ ചെയ്തിരുന്നു.നിരവധി മുന്നറിയിപ്പുകളും താക്കീതുകളും നല്‍കിയിട്ടും നടപടികള്‍ക്ക് വിധേയനായിട്ടും നിരന്തരമായി റവന്യു വകുപ്പിനും സര്‍ക്കാരിനും അപകീര്‍ത്തി ഉണ്ടാക്കുന്ന പ്രവര്‍ത്തികള്‍ ആവര്‍ത്തിച്ച് വരുന്നതിനാലും സര്‍വീസില്‍ തുടരുന്നതിന് പ്രാപ്തനല്ല എന്ന് ബോധ്യപ്പെട്ടതിനാലുമാണ് പവിത്രന് എതിരെ കർശനമായ നിയമ നടപടികൾക്ക് കാസർകോട് ജില്ലാ കളക്ടര്‍ സര്‍ക്കാരിലേക്ക് ശുപാർശ ചെയ്തത്.സമൂഹ മാധ്യമത്തിലൂടെയുള്ള അപകീര്‍ത്തി പ്രചാരണവുമായി ബന്ധപ്പെട്ട് ഈ വ്യക്തിക്കെതിരെ കഴിഞ്ഞ രണ്ട് വർഷത്തിനിടെ ഇത് നാലാമത്തെ കേസാണ്.