ഇന്ത്യയില്‍ നിന്ന് 36,500 കോടി രൂപയുടെ നേട്ടമുണ്ടാക്കിയ ജെയിന്‍ സ്ട്രീറ്റിന് സെബി എന്തിനാണ് വിലക്ക് പ്രഖ്യാപിച്ചത്

യുഎസ് ആസ്ഥാനമായി പ്രവര്‍ത്തിക്കുന്ന പ്രമുഖ ആഗോള ട്രേഡിങ് സംരംഭമാണ് ജെയിന്‍ സ്ട്രീറ്റ്. പ്രൊപ്രൈറ്ററി ട്രേഡിങ് കമ്പനിയായാണ് ഇത് പ്രവര്‍ത്തിക്കുന്നത്. ഹെഡ്ജ് ഫണ്ടുകളില്‍ നിന്നും വ്യത്യസ്ഥമായി ജെയിന്‍ സ്ട്രീറ്റ് സ്വന്തം മൂലധനം ഉപയോഗിച്ചാണ് ട്രേഡിങ് നടത്തുന്നത്. യുഎസ്, യൂറോപ്പ്, ഏഷ്യ എന്നിവിടങ്ങളിലായി 2,600-ല്‍ അധികം ജീവനക്കാരും ഓഫീസും കമ്പനിക്കുണ്ട്.

2023 ജനുവരി മുതല്‍ 2025 മാര്‍ച്ച് വരെയുള്ള കാലയളവില്‍ ജെയിന്‍ സ്ട്രീറ്റ് സ്ഥാപനങ്ങള്‍ ഇന്‍ഡക്‌സ് ഓപ്ഷന്‍ ട്രേഡിങ്ങിലൂടെ 43,289 കോടി രൂപ ലാഭം നേടി. പ്രധാനമായും ബാങ്ക് നിഫ്റ്റിയിലൂടെയാണ് തട്ടിപ്പ് നടത്തിയത്. വിവിധ തന്ത്രങ്ങളിലൂടെ വിപണിയില്‍ കൃത്രിമം കാണിച്ചതായി സെബി ആരോപിക്കുന്നു. ഫ്യൂച്ചര്‍ ട്രേഡിലും ക്യാഷ് ഇക്വിറ്റികളിലും നേരിട്ട നഷ്ടങ്ങള്‍ ഈ ലാഭത്തിലൂടെ ഭാഗികമായി നികത്താനും കമ്പനിക്ക് സാധിച്ചു. ഈ നഷ്ടങ്ങള്‍ കിഴിച്ചശേഷം 36,502 കോടി രൂപയുടെ അറ്റലാഭം കമ്പനി നേടിയതായും സെബി പറയുന്നു.

2024 ജനുവരി 17-ന് ജെയിന്‍ സ്ട്രീറ്റ് 734.93 കോടി രൂപയുടെ ലാഭം നേടിയിരുന്നു. ഒറ്റ ദിവസം നേടിയിട്ടുള്ള ഏറ്റവും ഉയര്‍ന്ന ലാഭമാണിത്. ഈ ദിവസത്തെ ഉദാഹരിച്ചാണ് കമ്പനിയുടെ തട്ടിപ്പിനെ കുറിച്ച് സെബി വിശദീകരിച്ചത്. ഈ ദിവസം രാവിലത്തെ ട്രേഡിങ് സെഷനില്‍ ക്യാഷ്, ഫ്യൂച്ചര്‍ വിപണികളില്‍ നിന്ന് ബാങ്ക് നിഫ്റ്റിയില്‍ ഉള്‍പ്പെട്ട ഓഹരികള്‍ (ഐസിഐസിഐ ബാങ്ക്, ആക്‌സിസ് ബാങ്ക്, എച്ച്ഡിഎഫ്‌സി ബാങ്ക് പോലുള്ള ഓഹരികള്‍) വലിയതോതില്‍ കമ്പനി വാങ്ങിക്കൂട്ടി. ഇതുവഴി കൃത്രിമമായി സൂചിക ഉയര്‍ത്തുകയും ഒപ്പം ബാങ്ക് നിഫ്റ്റി ഓപ്ഷനുകള്‍ വില്‍ക്കുകയും ചെയ്തു.

ഓപ്ഷന്‍ എക്‌സ്പയറി ദിവസങ്ങളില്‍ തട്ടിപ്പ് നടത്തുന്നതാണ് രണ്ടാമത്തെ രീതി. ഓപ്ഷന്‍ കാലാവധി അവസാനിക്കുന്ന ദിവസങ്ങളില്‍ ജെയിന്‍ സ്ട്രീറ്റ് ഓഹരി വിലകളില്‍ കൃത്രിമം കാണിച്ച് തട്ടിപ്പ് നടത്തിയെന്നാണ് കണ്ടെത്തല്‍.

* വഞ്ചനാപരവും അന്യായവുമായ വ്യാപാര  (പിഎഫ്‍യുടിപി) നിരോധന നിയമങ്ങള്‍ ലംഘിക്കല്‍.

സെബി നിയമത്തിലെ സെക്ഷന്‍ 11(1), 11(4), 11ബി(1), 11ഡി എന്നിവ പ്രകാരം സെബി ഇടക്കാല ഉത്തരവുകള്‍ പുറപ്പെടുവിച്ചു.

സെബി ഉത്തരവില്‍ ജെയിന്‍ സ്ട്രീറ്റ് അന്വേഷണത്തിനിടെ നല്‍കിയ രേഖാമൂലമുള്ള ഉത്തരങ്ങള്‍ ഉള്‍പ്പെടുത്തിയിട്ടുണ്ടെങ്കിലും സ്ഥാപനം പരസ്യമായി തെറ്റ് സമ്മതിച്ചിട്ടില്ല. നിയമാനുസൃതമായി കമ്പനി തങ്ങളുടെ തന്ത്രങ്ങളെ ന്യായീകരിക്കാനും പ്രതിരോധിക്കാനും ശ്രമിക്കുമെന്നാണ് പ്രതീക്ഷിക്കുന്നത്. അതേസമയം, റോയിട്ടേഴ്‌സിന് നല്‍കിയ മറുപടിയില്‍ സെബിയുടെ കണ്ടെത്തലുകളെ ജെയിന്‍ സ്ട്രീറ്റ് നിഷേധിക്കുകയാണ് ഉണ്ടായത്. സെബിയുമായി കൂടുതല്‍ ഇടപഴകുമെന്നും കമ്പനി അറിയിച്ചു.