മലയാളികളെ ഞെട്ടിച്ച പ്രളയം അഭ്രപാളികളിലൂടെ പുനരവതരിക്കുന്നു

മലയാളികളെ ഒന്നടങ്കം ഞെട്ടിപ്പിക്കുകയും കണ്ണീരിലാഴ്ത്തുകയും ചെയ്ത 2018ലെ പ്രളയത്തിന്റെ പശ്ചാത്തലത്തിൽ ഒരു ചിത്രം അണിയറയിൽ ഒരുങ്ങുന്നു. മൂന്നാം പ്രളയം എന്ന് പേരിട്ട പടത്തിന്റെ ചിത്രീകരണം അടിമാലിയിലും പരിസര പ്രദേശങ്ങളിലും ആരംഭിച്ചു. നയാഗ്ര മൂവീസിനു വേണ്ടി ദേവസ്യ കുര്യാക്കോസ് അടിമാലി നിർമ്മിക്കുന്ന ഈ ചിത്രം സംവിധാനം ചെയ്യുന്നത് നവാഗതനായ രതീഷ് രാജു എം.ആർ. 'ഒന്നുമറിയാതെ' എന്ന ചിത്രത്തിലൂടെ ശ്രദ്ധേയനായ എസ്.കെ. വിൽവൻ ആണ് രചയിതാവ്. 'സ്കൂൾ ഡയറി', 'വള്ളിക്കെട്ട്' തുടങ്ങിയ ചിത്രങ്ങളിലൂടെ ശ്രദ്ധേയനായ അഷ്‌ക്കർ സൗദാൻ നായക വേഷം കൈകാര്യം ചെയ്യുന്നു. സായ് കുമാർ, അനിൽ മുരളി, അരിസ്റ്റോ സുരേഷ്, ബിന്ദു പണിക്കർ എന്നിവരും വേഷമിടുന്നു. അടിമാലിക്കും മൂന്നാറിനും മധ്യേയുള്ള ഒരു കുന്നിൻ മുകളിലെ പള്ളിയിലായിരുന്നു ചിത്രീകരണം.