തിരിച്ചു പോകാൻ പറഞ്ഞു, ചെമ്പനും ലിജോയും മടങ്ങിയത് അവാർഡുമായി

മേളക്കിടയിൽ ഒരു മലയാളി സംവിധായകനോട് കേരളത്തിലേക്ക് മടങ്ങി പോകാൻ ആവശ്യപ്പെട്ട വർഷമാണിതെന്നും മലയാളി പ്രേക്ഷകർ ഓർക്കണം. ഐ.ഡി.യെന്ന ചിത്രത്തിലൂടെ ശ്രദ്ധേയനായ കമലിനാണ് ദുരനുഭവം നേരിടേണ്ടി വന്നത്. പ്രദർശന വേദിയിലേക്ക് വളരെ വൈകിയും ആളെ കടത്തി വിടാത്തത് ചോദ്യം ചെയ്തപ്പോഴാണ് അവാർഡ് നേടിയ ചലച്ചിത്ര സംവിധായകനും, എന്റർടൈൻമെന്റ് സൊസൈറ്റി ഓഫ് ഗോവയുടെ വൈസ് ചെയർപേഴ്‌സണുമായ രാജേന്ദ്ര തിലക് "നിങ്ങൾ കേരളത്തിൽ നിന്നുമാണെങ്കിൽ മടങ്ങി പോകൂ" എന്ന മറുപടി കൊടുത്ത്. അവിടെ നിന്നും ഒരു നടനും സംവിധായകനും മികച്ച അവാർഡുകൾ രണ്ടെണ്ണം സ്വന്തമാക്കി കേരളത്തിലേക്ക് മടങ്ങിയതാണ് കുറിക്കു കൊള്ളുന്ന മറുപടിയായത്. ഇ.മ.യൗ വെന്ന ചിത്രത്തിനാണ് ഇരുവരും അവാർഡ് സ്വന്തമാക്കിയത്.

ദി ഗിൽറ്റി എന്ന ചിത്രത്തിന്റെ പ്രദർശനത്തിന് പതിനഞ്ചു മിനിട്ടു ബാക്കി നിന്നപ്പോഴും നീണ്ട ക്യൂവിൽ കാത്തു നിൽക്കുന്ന ഡെലിഗേറ്റുകളെ കടത്തി വിടാൻ അധികാരികൾ തയ്യാറായില്ല. പലരും ഏതാണ്ട് മുക്കാൽ മണിക്കൂറിനു മുൻപേ ക്യൂവിൽ ഇടം പിടിച്ചവരാണ്. ഇത് ചോദ്യം ചെയ്തപ്പോഴാണ് കമലിന് ഇങ്ങനെ കേൾക്കേണ്ടി വന്നത്. എന്നാൽ മേള സി.ഇ.ഒ, അമേയ അഭ്യൻകാറിന് കമൽ പരാതി സമർപ്പിക്കുകയും അവർ മാപ്പു പറയുകയും ചെയ്തു.

ശേഷം 29 ചലച്ചിത്ര പ്രവർത്തകർ ചേർന്ന് കമലിന് ഐകദാർഢ്യം പ്രഖ്യാപിച്ചു ഹർജി ഒപ്പിട്ടു സമർപ്പിക്കുകയും ചെയ്തു. ഇതിൽ മലയാളികളായ ഡോ. ബിജു, രാജീവ് രവി, റിമ കല്ലിങ്കൽ, ആഷിക് അബു, ദിലീഷ് പോത്തൻ, സക്കറിയ മുഹമ്മദ്, സമീർ താഹിർ, സനൽകുമാർ ശശിധരൻ, ശ്യാം പുഷ്ക്കരൻ തുടങ്ങിയവരും ഉണ്ടായിരുന്നു.