വിവാഹഫോട്ടോ എടുക്കരുത്; കർശന നിയന്ത്രണത്തോടെ വിജയ്-രശ്മിക വിവാഹം 26ന്

തങ്ങളുടെ വിവാഹത്തിന്റെ ചിത്രങ്ങളോ വീഡിയോകളോ പുറത്തുപോകുന്നില്ലെന്ന് ഉറപ്പുവരുത്താനായി വിവാഹ ചടങ്ങുകളിൽ ഫോൺ ഉപയോഗിക്കുന്നതിന് വിജയ്‌യും രശ്മികയും നിയന്ത്രണം ഏർപ്പെടുത്തിയതായി അടുത്തിടെ ഒരു റിപ്പോർട്ട് പുറത്തുവന്നിരുന്നു. പ്രമുഖ ടോളിവുഡ് വാർത്താ പോർട്ടലായ തുപാക്കി നൽകിയ റിപ്പോർട്ട് പ്രകാരം, ഒരു പ്രമുഖ ഒടിടി പ്ലാറ്റ്‌ഫോം ഇവരുടെ വിവാഹ വീഡിയോയുടെ എക്സ്ക്ലൂസീവ് അവകാശങ്ങൾക്കായി വൻ തുക വാഗ്ദാനം ചെയ്ത് ദമ്പതികളെ സമീപിച്ചിരുന്നു. എന്നാൽ വിജയ്‌യും രശ്മികയും ഈ നിർദ്ദേശം നിരസിച്ചതായാണ് വിവരം. വിവാഹ ചടങ്ങുകൾ പൂർണ്ണമായും സ്വകാര്യമായിരിക്കണമെന്നും അത് വാണിജ്യവൽക്കരിക്കാൻ താൽപ്പര്യമില്ലെന്നുമാണ് വിജയ്‌യുടെ നിലപാട്. വിവാഹം തികച്ചും വ്യക്തിപരമായ ഒരു ചടങ്ങായി തന്നെ നിലനിൽക്കണമെന്ന് താരം ആഗ്രഹിക്കുന്നു.

അടുത്ത സുഹൃത്തുക്കളുടെയും കുടുംബാംഗങ്ങളുടെയും സാന്നിധ്യത്തിൽ വിവാഹം ആഘോഷിക്കാനാണ് രശ്മികയും വിജയ്‌യും ആഗ്രഹിക്കുന്നത്.  ഫെബ്രുവരി 26-ന് നടക്കുന്ന വിവാഹത്തിനായുള്ള തയ്യാറെടുപ്പുകൾ അതീവ രഹസ്യമായാണ് നടക്കുന്നത്. ഇതിന്റെ ഭാഗമായി വിവരങ്ങൾ പുറത്തുവിടരുതെന്ന് കർശന നിർദ്ദേശം നൽകിയിട്ടുണ്ട്. വളരെ കുറച്ച് ആളുകൾക്ക് മാത്രമേ വിവാഹത്തിന്റെ പൂർണ്ണ വിവരങ്ങൾ അറിയാവൂ എന്നതിനാൽ സുഹൃത്തുക്കളും കുടുംബാംഗങ്ങളും ഇക്കാര്യത്തിൽ മൗനം പാലിക്കുകയാണ്.

വിവാഹം സ്വകാര്യ ചടങ്ങാണെങ്കിലും മാർച്ച് 4-ന് ഹൈദരാബാദിൽ വെച്ച് ഇരുവരും സിനിമാ രംഗത്തെ സുഹൃത്തുക്കൾക്കായി വലിയൊരു റിസപ്ഷൻ സംഘടിപ്പിക്കുന്നുണ്ട്. വിവാഹത്തിനും റിസപ്ഷനും മാധ്യമങ്ങൾക്ക് പ്രവേശനമുണ്ടാകില്ലെന്നും എന്നാൽ ഏതാനും ദിവസങ്ങൾക്ക് ശേഷം വിജയ്‌യും രശ്മികയും മാധ്യമങ്ങളെ കാണുമെന്നും റിപ്പോർട്ടുകൾ പറയുന്നു.

വിജയ്‌യുടെയും രശ്മികയുടെയും ഒപ്പുകളടങ്ങിയ ഒരു വിവാഹ ക്ഷണക്കത്ത് കഴിഞ്ഞ ആഴ്ച സമൂഹമാധ്യമങ്ങളിൽ വൈറലായിരുന്നു. "ഞങ്ങളുടെ ജീവിതത്തിലെ ഒരു പ്രത്യേക വാർത്ത നിങ്ങളുമായി പങ്കുവെക്കാനും വലിയൊരു നിമിഷത്തിന്റെ ഭാഗമാകാൻ നിങ്ങളെ ക്ഷണിക്കാനുമാണ് ഞാൻ ഇത് എഴുതുന്നത്. കുടുംബങ്ങളുടെ സ്നേഹത്തോടും അനുഗ്രഹത്തോടും കൂടി ഫെബ്രുവരി 26-ന് ലളിതമായ ചടങ്ങിൽ വെച്ച് ഞാനും രശ്മികയും വിവാഹിതരാകുകയാണ്" എന്നാണ് ആ കത്തിൽ പറഞ്ഞിരുന്നത്.