അശോക് ഗെലോട്ട് രാജസ്ഥാൻ മുഖ്യമന്ത്രിയാകും

ന്യൂഡൽഹി: തർക്കത്തിനൊടുവിൽ രാജസ്ഥാൻ മുഖ്യമന്ത്രിയായി അശോക് ഗെലോട്ടിനെ തീരുമാനിച്ചതായി റിപ്പോർട്ടുകൾ. ഔദ്യോഗിക പ്രഖ്യാപനം അൽപ്പ സമയത്തിനകം ഉണ്ടാകും. അശോക് ഗെലോട്ടിനും സച്ചിൻ പൈലറ്റിനും ഒപ്പം നിൽക്കുന്ന ചിത്രം രാഹുൽ ഗാന്ധി ട്വീറ്റ് ചെയ്തു. രാജസ്ഥാന്റെ ഐക്യ നിറങ്ങൾ എന്നാണു ചിത്രത്തിന് രാഹുൽ അടിക്കുറിപ്പ് നൽകിയത്. എം എൽ എ മാരുടെ യോഗത്തിൽ സച്ചിൻ പൈലറ്റ് തന്നെ അശോക് ഗെലോട്ടിന്റെ പേര് നിർദേശിക്കും എന്നാണു സൂചന. രാജസ്ഥാന്റെ മുഖ്യമന്ത്രി കസേരയിലേക്ക് അശോക് ഗെലോട്ട് വരുന്നത് മൂന്നാംതവണയാണ്. ദീർഘകാലം പാർട്ടിയിലും ഭരണത്തിലും സുപ്രധാന പദവികൾ വഹിച്ചതിന്റെ പരിചയവുമായാണ് ഗെലോട്ട് ഒരിക്കൽ കൂടി മുഖ്യമന്ത്രിയാകുന്നത്.