'ആദരണീയ മോദിജി വേണ്ട; മോദി മതി'; ബിജെപി എംപിമാരോട് പ്രധാനമന്ത്രി നരേന്ദ്രമോദി

ന്യൂഡൽഹി: തന്റെ പേരിനൊപ്പം 'ആദരണീയ മോദിജി' എന്ന് ചേര്‍ത്ത് വിളിക്കരുതെന്നും 'മോദി' മാത്രം മതിയെന്നും പ്രധാനമന്ത്രി നരേന്ദ്രമോദി. ആദരണീയനായ മോദിജി എന്ന് വിളിക്കുന്നതിലൂടെ അകലം അനുഭവപ്പെടുന്നുവെന്നാണ് പ്രധാനമന്ത്രി പറഞ്ഞത്. തന്നെ ‘മോദി ജി’ എന്ന് വിളിച്ച് പൊതുജനങ്ങളിൽനിന്ന് അകറ്റരുതെന്നും ബിജെപി എംപിമാരോട് പ്രധാനമന്ത്രി പറഞ്ഞു. പാർലമെന്റ് ഹൗസ് കോംപ്ലക്സിൽ ചേർന്ന ബിജെപി പാർലമെന്ററി പാർട്ടി യോഗത്തെ അഭിസംബോധന ചെയ്യുകയായിരുന്നു അദ്ദേഹം. താൻ പാർട്ടിയിലെ ഒരു സാധാരണ പ്രവർത്തകനാണെന്നും ജനങ്ങൾ തന്നെ അവരുടെ കുടുംബത്തിന്റെ ഭാഗമായി കണക്കാക്കുന്നുവെന്നും പ്രധാനമന്ത്രി പറഞ്ഞു. തന്നെ രാജ്യത്തെ സാധാരണ ജനങ്ങളില്‍ ഒരാളായി കരുതണമെന്നും അദ്ദേഹം എംപിമാരോട് അഭ്യർത്ഥിച്ചു.