തമിഴ്നാട് രാഷ്ട്രീയത്തിൽ ട്വിസ്റ്റ്; സ്റ്റൈൽ മന്നനും ഉലകനായകനും ഒന്നിക്കുന്നു

തമിഴ്നാട്ടിൽ രജനികാന്ത്- കമൽഹാസൻ രാഷ്ട്രീയ സഖ്യത്തിന് വഴിയൊരുങ്ങുന്നു. ജനങ്ങൾക്ക് വേണ്ടി ഒരുമിക്കാൻ തയ്യാറാണെന്ന് സൂപ്പർ താരങ്ങൾ പ്രഖ്യാപിച്ചു. അടുത്ത നിയമസഭാ തെരഞ്ഞെടുപ്പിൽ ഒരുമിച്ച് മത്സരിക്കാനാണ് ഉലക നായകനും സ്റ്റൈല്‍ മന്നനും തയ്യാറെടുക്കുന്നത്. രജനി കാന്തിന്റെ പുതിയ രാഷ്ട്രീയ പാർട്ടിയുടെ പ്രഖ്യാപനവും അടുത്തവർഷം ആദ്യം ഉണ്ടാകും.

നാൽപത്തിയഞ്ചു വർഷമായി സിനിമയിൽ ഒരുമിച്ച് പ്രവർത്തിക്കുന്നുവെന്നാണ് പുതിയ സഖ്യത്തിന് സ്റ്റൈൽ മന്നന്റെ വിശദീകരണം. ഈ സൗഹൃദം ഇനിയും തുടരും. ജനങ്ങൾക്കുവേണ്ടി ഒരുമിക്കാൻ തയ്യാറാണെന്ന് കമൽ ഹാസനും പറയുന്നു.

രജനികാന്തിന്റെ മാസ് പരിവേഷം. കമൽ ഹാസന്റെ ബൗദ്ധിക സാന്നിധ്യം. തമിഴ് രാഷ്ട്രീയത്തിൽ പുതിയ സമവാക്യത്തിനാണ് ഉലകനായകന്റേയും സ്റ്റൈൽ മന്നന്റേയും തയ്യാറെടുപ്പ്. ജയലളിതയ്ക്ക് ശേഷം സിനിമാ ലോകത്തുനിന്നുമുള്ള രാഷ്ട്രീയ പരീക്ഷണം. എംജിആറിനെ നെഞ്ചേറ്റിയവർ തങ്ങളേയും വരവേൽക്കുമെന്ന് ഇരുവരും കണക്കു കൂട്ടുന്നു. മാത്രമല്ല, മക്കൾ നീതിമയ്യം രൂപീകരിച്ച് രാഷ്ട്രീയത്തിൽ സജീവമാകാൻ ശ്രമിച്ചെങ്കിലും കമലിന്റെ ഈ നീക്കത്തിന് വേണ്ടത്ര പിന്തുണ ലഭിച്ചില്ല.

അടുത്തവർഷം ആദ്യം രജനികാന്തിന്റെ പാർട്ടി പ്രഖ്യാപനം ഉണ്ടാകും... ആരാധക സംഘടനയായ രജനി മക്കൾ മൻട്രത്തെ രാഷ്ട്രീയപ്പാർട്ടിയായി പ്രഖ്യാപനിക്കാനാണ് നീക്കം.