ജോലി സമ്മര്‍ദമാണ് ജീവനൊടുക്കാന്‍ പ്രേരിപ്പിച്ചത്; ജിഎസ്ടി ഡെപ്യൂട്ടി കമ്മീഷണറുടെ മരണത്തില്‍ കുടുംബം

അപെക്‌സ് അഥീന സൊസൈറ്റിയിലാണ് സംഭവം നടന്നത്. രാവിലെ പതിനൊന്ന് മണിയോടെയാണ് സഞ്ജയ് അപ്പാര്‍ട്ട്‌മെന്റിലെ 15-ാം നിലയിലെ തന്റെ വീട്ടില്‍ നിന്നും താഴേക്ക് ചാടിമരിച്ചത്. ഗാസിയബാദിലെ ജിഎസ്ടി ഡിപ്പാര്‍ട്ട്‌മെന്റില്‍ ജോലി ചെയ്തുവരികയായിരുന്നു ഇദ്ദേഹം.

59കാരനായ ഇദ്ദേഹം ക്യാന്‍സര്‍ ചികിത്സയിലായിരുന്നുവെന്നും രോഗത്തെത്തുടര്‍ന്ന് കടുത്ത വിഷാദത്തിലായിരുന്നു സഞ്ജയ് എന്നും ചില റിപ്പോര്‍ട്ടുകള്‍ സൂചിപ്പിക്കുന്നു. സഞ്ജയ് സിംഗിന് അഞ്ച് വര്‍ഷം മുമ്പ് പ്രോസ്റ്റേറ്റ് ക്യാന്‍സര്‍ സ്ഥിരീകരിച്ചിരുന്നുവെന്ന് ഗാസിയാബാദിലെ ജിഎസ്ടി അഡീഷണല്‍ കമ്മീഷണര്‍ എംപി സിംഗ് പറഞ്ഞു. അവസാന ഘട്ടത്തിലാണ് അദ്ദേഹത്തിന് ക്യാന്‍സര്‍ സ്ഥിരീകരിച്ചതെന്നും ഇതേത്തുടര്‍ന്ന് അദ്ദേഹം കടുത്ത വിഷാദത്തിലായിരുന്നുവെന്നും എംപി സിംഗ് പറഞ്ഞു.

എന്നാല്‍ ഈ ആരോപണങ്ങള്‍ തള്ളി സഞ്ജയ് സിംഗിന്റെ കുടുംബം രംഗത്തെത്തി. ജോലിസ്ഥലത്തെ സമ്മര്‍ദ്ദമാണ് അദ്ദേഹത്തെ ജീവനൊടുക്കാന്‍ പ്രേരിപ്പിച്ചതെന്ന് സഞ്ജയ് സിംഗിന്റെ ഭാര്യ പറഞ്ഞു.

"അദ്ദേഹം ക്യാന്‍സറിനെ അതിജീവിച്ചയാളാണ്. ക്യാന്‍സറുമായി പോരാടിക്കൊണ്ടിരിക്കുകയായിരുന്നില്ല അദ്ദേഹം. അദ്ദേഹത്തിന്റെ ആരോഗ്യം മാത്രമല്ല മറ്റുള്ളവരുടെ ആരോഗ്യം നോക്കുന്നതിലും അദ്ദേഹം ശ്രദ്ധ പുലര്‍ത്തിയിരുന്നു," ഭാര്യ പറഞ്ഞു.

"ക്യാന്‍സര്‍ ചികിത്സിച്ച് മാറ്റാന്‍ കഴിയുന്ന ഘട്ടത്തിലാണ് സ്ഥിരീകരിച്ചത്. ഒരിക്കലും ക്യാന്‍സര്‍ അദ്ദേഹത്തിന്റെ ജീവന് ഭീഷണിയായിരുന്നില്ല," ഭാര്യ കൂട്ടിച്ചേര്‍ത്തു.

"വര്‍ഷങ്ങള്‍ക്ക് മുമ്പ് തന്നെ അദ്ദേഹം ക്യാന്‍സര്‍ മുക്തനായി. അതുകൊണ്ട് തന്നെ അദ്ദേഹത്തിന്റെ ആരോഗ്യത്തില്‍ ഞങ്ങള്‍ക്കും ഭയമില്ലായിരുന്നു. എന്നാല്‍ ഇപ്പോള്‍ സംഭവിച്ചത് വളരെ അസാധാരണമാണ്," ഭാര്യ കൂട്ടിച്ചേര്‍ത്തു.

ഭാര്യയും രണ്ട് ആണ്‍മക്കളും അടങ്ങുന്നതാണ് സഞ്ജയ് സിംഗിന്റെ കുടുംബം. സിംഗിന്റെ മൂത്തമകന്‍ ഗുരുഗ്രാമിലാണ് ജോലി ചെയ്യുന്നത്. ഇളയമകന്‍ ബിഡിഎസ് വിദ്യാര്‍ത്ഥിയാണ്.