തന്ത്രിയെ മറയാക്കി മന്ത്രിയെ രക്ഷിക്കണ്ട; ശബരിമല സ്വർണക്കൊള്ള കേസിൽ കെ. മുരളീധരൻ

തിരുവനന്തപുരം: ശബരിമല സ്വർണക്കൊള്ള കേസ് തന്ത്രി കണ്ഠര് രാജീവരുടെ അറസ്റ്റിൽ ഒതുക്കിത്തീർക്കാൻ അനുവദിക്കില്ലെന്ന് കോൺഗ്രസ് നേതാവ് കെ. മുരളീധരൻ. ഭരണകൂടത്തിന്റെ ഒത്താശയോടെ നടന്ന വലിയ അഴിമതിയാണിതെന്നും തന്ത്രിയെ മുൻനിർത്തി വകുപ്പ് മന്ത്രിയെയും ഉന്നതരെയും രക്ഷിക്കാനുള്ള നീക്കമാണ് സർക്കാർ നടത്തുന്നതെന്നും അദ്ദേഹം ആരോപിച്ചു. കേസിൽ തന്ത്രി എങ്ങനെ ബന്ധപ്പെട്ടിരിക്കുന്നു എന്നത് സംബന്ധിച്ച് പൊതുജനങ്ങൾക്ക് അറിയില്ല. അന്വേഷണത്തിലൂടെ മാത്രമേ അത് ബോധ്യമാകൂവെന്നും അദ്ദേഹം പറഞ്ഞു.