നമ്പി നാരായണന് 50 ലക്ഷം കൈമാറി, ചടങ്ങ് നടന്നത് ദർബാർ ഹാളിൽ

ചാരക്കേസിൽ നമ്പി നാരായണനെ പീഡിപ്പിച്ച മൂന്ന് ഉദ്യോഗസ്ഥർ അന്വേഷണം നേരിടണം എന്നും സംസ്ഥാന സർക്കാർ 50 ലക്ഷം രൂപ നഷ്പരിഹാരം നൽകണമെന്നുമായിരുന്നു സുപ്രീംകോടതി വിധി. തുടർന്ന് വിധി നടപ്പാക്കി നമ്പി നാരായണനെ ആദരിക്കാൻ മന്ത്രിസഭ തീരുമാനിക്കുകയായിരുന്നു.

നമ്പി നാരായണന് 50 ലക്ഷം രൂപ നഷ്ടപരിഹാരം നൽകാൻ വിധിച്ച സുപ്രീംകോടതി കേസ് അന്വേഷിച്ച ഉദ്യോഗസ്ഥർക്കെതിരെ അന്വേഷണം നടത്തണമെന്നും വിധിച്ചു. നമ്പി നാരായണന്‍റെ അറസ്റ്റ് അനാവശ്യമായിരുന്നുവെന്നും കോടതി വ്യക്തമാക്കിയിരുന്നു. മാനസിക പീഡനത്തിന് നമ്പി നാരായണൻ ഇരയായതായും കോടതി നിരീക്ഷിച്ചു.

നഷ്ടപരിഹാരം നൽകണമെന്നും കുറ്റക്കാരായ അന്വേഷണ ഉദ്യോഗസ്ഥരിൽ നിന്ന് തുക ഈടാക്കണമെന്നും ആവശ്യപ്പെട്ടാണ് നമ്പി നാരായണൻ സുപ്രീംകോടതിയെ സമീപിച്ചത്. വാദത്തിനിടെ ഇതിനോട് യോജിച്ച കോടതി 75 ലക്ഷം രൂപ വരെ നഷ്ടപരിഹാരം നൽകുന്ന കാര്യം പരിഗണിക്കാം എന്ന് വാക്കാൽ നിരീക്ഷിച്ചിരുന്നു.

ചീഫ് ജസ്റ്റിസ് ദീപക് മിശ്ര അധ്യക്ഷനായ ബെഞ്ചായിരുന്നു വിധി പ്രസ്താവിച്ചത്. കാൽനൂറ്റാണ്ടോളം പഴക്കമുള്ള ചാരക്കേസിൽ നീതി തേടിയുള്ള നമ്പി നാരായണന്‍റെ പോരാട്ടത്തിലാണ് സുപ്രീംകോടതി വിധി പ്രസ്താവിച്ചത്.