തനിക്കെതിരായ കേസ് പ്രതികരിക്കുന്നവരെ നിശബ്ദരാക്കാനുള്ള നീക്കത്തിന്റെ ഭാഗമെന്ന് ജോയ് മാത്യു

പ്രതികരിക്കുന്നവരെ നിശബ്ദരാക്കുക എന്നത് എല്ലാ ഭരണകൂടത്തിന്റെയും സ്വഭാവമാണ്. ചുമത്തിയിരിക്കുന്ന വകുപ്പുകള്‍ കാണുമ്പോള്‍ അതാണ് ഉദ്ദേശമെന്നാണ് മനസ്സിലാക്കുന്നത്. ആരെയും തീവ്രവാദിയാക്കാവുന്ന കാലമാണ് ഇപ്പോഴുള്ളത്. എന്നാല്‍, അങ്ങനെയുള്ള പേടി തനിക്കില്ല- ജോയ് മാത്യു പറഞ്ഞു.

കന്യാസ്ത്രീകളുടെ സമരത്തിന് പിന്തുണ പ്രഖ്യാപിച്ച് മൗനമായി നടത്തിയ പ്രകടനമാണ് മിഠായിത്തെരുവില്‍ നടന്നത്. പൊതുജനത്തിന് തടസ്സമുണ്ടാക്കിയിട്ടില്ല. അവിടെ പ്രകടനം നിരോധിച്ചിട്ടുള്ളതായി അറിയില്ല. അങ്ങനെയൊരു ബോര്‍ഡും അവിടെ സ്ഥാപിച്ചിരുന്നില്ല. അങ്ങനെ നിരോധനം ഉണ്ടെങ്കില്‍ സര്‍ക്കാര്‍ ഉത്തരവിറക്കി, ജനങ്ങളെ അറിയിക്കുകയും ബോര്‍ഡ് വെക്കുകയും ചെയ്യണമെന്നും അദ്ദേഹം പറഞ്ഞു.

നിരോധിത മേഖലയില്‍ പ്രകടനം നടത്തിയതിന് ജോയ് മാത്യു ഉള്‍പ്പെടെ തിരിച്ചറിയാവുന്ന നൂറോളം പേര്‍ക്കെതിരെയാണ് കോഴിക്കോട് ടൗണ്‍ പൊലീസ് കേസെടുത്തത്.