അമൃത് പദ്ധതിയിലൂടെ പുതുജീവൻ നേടി മൂവാറ്റുപുഴ നഗരസഭയിലെ ആമ്പറ്റക്കുളം

മൂവാറ്റുപുഴ നഗരസഭ 23-ാം വാർഡിൽ നവീകരിച്ച ആമ്പറ്റക്കുളം നഗരസഭ ചെയർപേഴ്സൺ പി.പി. എൽദോസ് നാടിനു സമർപ്പിച്ചു. അമൃത് പദ്ധതിയിൽ ഉൾപ്പെടുത്തി 34 ലക്ഷം രൂപ ചെലവഴിച്ചാണ് കുളത്തിൻ്റെ നവീകരണ പ്രവർത്തനങ്ങൾ പൂർത്തീകരിച്ചത്. വർഷങ്ങളായി ഉപയോഗ ശൂന്യമായിരുന്ന കുളം മാലിന്യ നിക്ഷേപ കേന്ദ്രമായതോടെ തദ്ദേശ വാസികൾ ദുരിതത്തിലായിരുന്നു. നവീകരണ പ്രവർത്തനങ്ങളുടെ ഭാഗമായി കുളത്തിലെ ചെളിയും ചപ്പുചവറുകളും നീക്കം ചെയ്ത് ആഴം കൂട്ടുകയും നാലു വശവും സംരക്ഷണ ഭിത്തിയും ചുറ്റുമതിലും നിർമിക്കുകയും ചെയ്തു. ഇതോടെ കുളം ജല സമൃദ്ധമായി മാറി.