നാടകം ജീവിതമാക്കിയ കലാകാരൻ; മോഹൻ കൃഷ്ണന് കേരള സംഗീത നാടക അക്കാദമിയുടെ ഗുരുപൂജ പുരസ്കാരം

രണ്ടു വർഷക്കാലം പി.എ.എം. ഹനീഫിൻ്റെ നേതൃത്വത്തിൽ കൊരട്ടി, കാടുകുറ്റിയിൽ നടന്ന എം.എസ്. നമ്പൂതിരി നാടക ശില്പശാലയിൽ പരിശീലകനായി പങ്കെടുത്തിട്ടുണ്ട്. ജോസ് ചിറമ്മൽ സംവിധാനം ചെയ്ത ഗോദോയെ കാത്ത് എന്ന നാടകം നിരവധി വേദികളിൽ അവതരിപ്പിക്കുകയും നല്ല നടനുള്ള പുരസ്കാരം നേടുകയും ചെയ്തു. ജോസ് ചിറമ്മൽ സംവിധാനം ചെയ്ത സൂര്യവേട്ട ഉൾപ്പെടെ നിരവധി നാടകങ്ങളിൽ അഭിനയിക്കുകയും പിന്നരങ്ങിൽ പ്രവർത്തിക്കുകയും ചെയ്തു. നരിപ്പറ്റ രാജു സംവിധാനം ചെയ്ത വിവിധ നാടകങ്ങളിൽ മുഖ്യകഥാപാത്രങ്ങളെ അവതരിപ്പിട്ടുണ്ട്. കൂടാതെ നിരവധി നാടകങ്ങൾ സംവിധാനം ചെയ്തിട്ടുണ്ട്. ചിലപ്പതികാരം, പൂതപ്പാട്ട്, ചാവറ അച്ചൻ്റെ ജീവചരിത്രം തുടങ്ങിയവ നൃത്ത സംഗീത നാടക രൂപത്തിൽ അരങ്ങിൽ കൊണ്ടുവന്നു.

തെരുവ് നാടകങ്ങളിലും സജീവമായി പങ്കെടുത്തു. സ്കൂളുകളിലും ഗ്രാമപ്രദേശങ്ങളിലെ കൂട്ടായ്മകളിലും നാടക കളരികൾ സംഘടിപ്പിച്ചു. കോവിഡ് കാലത്ത് വീടുതന്നെ അരങ്ങാക്കികൊണ്ട് മരിയോ ഫ്രറ്റിയുടെ പാബ്ലൊനെരൂദ എന്ന നാടകം, മോഹൻ തൻ്റെ ജീവിതപങ്കാളിയും മക്കളുമായി ചേർന്ന് ഡിജിറ്റലായി ഒരുക്കി ജനശ്രദ്ധ പിടിച്ചുപറ്റിയിരുന്നു. അന്ന് രൂപം കൊടുത്ത ഹോം തിയേറ്റർ റിയാലിറ്റീസ് എന്ന സംഘം ജീവിതപങ്കാളിയും മക്കളും ശിഷ്യഗണങ്ങളുമായി ചേർന്ന് ഇന്നും തുടർന്നുകൊണ്ടിരിക്കുന്നു. ഇപ്പോഴും മുഴുവൻ സമയവും നാടക പ്രവർത്തകനാണ് 61 കാരനായ മോഹൻ കൃഷ്ണൻ.