ആടുകളെ വിറ്റുകിട്ടിയ പണം ദുരിതാശ്വാസ നിധിയിൽ സംഭാവന നൽകി സുബൈദ ഉമ്മ

കൊല്ലം സ്വദേശി സുബൈദ ഉമ്മ മുഖ്യമന്ത്രിയുടെ ദുരിതാശ്വാസനിധിയിലേക്ക് തുക സംഭാവനയായി നൽകിയത്.

ചിലർ ഈ ഉമ്മയെ പോലെയാണ്, പല പ്രതിസന്ധികളാൽ സ്വന്തം ജീവിതം വരിഞ്ഞുമുറുകുമ്പോഴും മറ്റുള്ളവരുടെ നൊമ്പരങ്ങളെക്കുറിച്ചായിരിക്കും കൂടുതൽ ആകുലത. ആടുകളെ വിറ്റ് കോവിഡിൻ്റെ ആദ്യഘട്ടത്തിൽ മുഖ്യമന്ത്രിയുടെ ദുരിതാശ്വാസനിധിയിലേക്ക് സംഭാവന ചെയ്ത പോർട്ട് കൊല്ലം സ്വദേശി സുബൈദ ബീവി വാടകയ്ക്ക് എടുത്ത ചായക്കട നടത്തിയും ഒറ്റ വാങ്ങിയ വീട്ടിൽ അന്തിയുറങ്ങിയും ജീവിതം പഴയപടി തുടരുകയാണ്, മാറ്റങ്ങളേതുമില്ലാതെ. ജീവിതം പോലെ തന്നെ ഇക്കാലയളവിൽ മാറ്റമില്ലാത്ത ഒന്നുകൂടിയുണ്ട്; സുബൈദ ഉമ്മയുടെ നന്മയും നിറവുമുള്ള ഹൃദയം. തന്നെക്കൊണ്ട് ആവുന്ന വിധം സമൂഹത്തിന് നന്മ ചെയ്യണമെന്നത് സുബൈദ ബീവിക്ക് ആഗ്രഹം എന്നതിലുപരി ഒരു പ്രതിജ്ഞ പോലെയാണ്.

ഇത്തവണ നാല് ആടുകളുടെ വിറ്റപ്പോൾ കിട്ടിയത് 16,000 രൂപയാണ്. 5000 രൂപ ദുരിതാശ്വാസ നിധിയിലേക്ക് നൽകി. നോമ്പുകാലമാണ്. ബാക്കി തുക കൊണ്ട് 30 കുടുംബങ്ങൾക്ക് ഭക്ഷ്യധാന്യം വാങ്ങി നൽകുന്നു. കഴിഞ്ഞ തവണ 5501 രൂപയാണ് ദുരിതാശ്വാസനിധിയിലേക്ക് നൽകിയത്. കഴിഞ്ഞതവണ ചിലർ ആടുകളെ സമ്മാനമായി നൽകിയിരുന്നു.

എല്ലാവരുടെയും സ്നേഹം മതിയെന്നും പാരിതോഷികങ്ങൾ ഒഴിവാക്കണമെന്നും സുബൈദ ഉമ്മ പറയുന്നു. രണ്ട് പെൺമക്കളും ഒരു മകനുമാണ് സുബൈദ ബീവിക്ക് ഉള്ളത്. ഭർത്താവ് അബ്ദുൽ സലാമാണ് ചായക്കടയുടെ മേൽനോട്ടം വഹിക്കുന്നത്.

ഇവരുടെ പക്കൽ ഇനി അഞ്ച് വലിയ ആടുകളും നാല് ആട്ടിൻകുട്ടികളും ഉണ്ട്. സുബൈദാ ബീവി പാൽ എടുക്കുകയോ വിൽപ്പന നടത്തുകയോ ചെയ്യുന്നില്ല. തള്ള ആടുകളുടെ പാൽ മുഴുവനും ആട്ടിൻകുട്ടിക്കള കുടിക്കാൻ അനുവദിക്കും. സ്വന്തമായി ഒരു വീടില്ലെങ്കിലും വിശാലവും സുദൃഢവുമായ ഹൃദയം സുബൈദ ഉമ്മക്ക് ഉണ്ട്. അത്തരം വിശാല മനസ്സുകളാണ് ആപത്ഘട്ടങ്ങളിൽ പോലും പതറാതെ പിടിച്ചുകയറാൻ അനേകർക്ക്‌ കൈത്താങ്ങാവുന്നതും.