ചെങ്കോട്ടയായി പത്തനംതിട്ട; വീണത് യുഡിഎഫിന്റെ ഉരുക്കു കോട്ട

കേരളത്തിൽ മറ്റൊരു ജില്ലയ്ക്കും അവകാശപ്പെടാൻ കഴിയാത്ത ഒരു സ്ഥാനമുണ്ട് പത്തനംതിട്ടയ്ക്ക്. അത്, ഒരു മന്ത്രി സ്ഥാനത്തിന് പകരമായി വന്ന ജില്ലയാണ് പത്തനംതിട്ട എന്നതാണ്. തികച്ചും പ്രാദേശികമായ രാഷ്ട്രീയമായ ഒരു ആവശ്യത്തിൽ പിറന്ന നാട് . സ്വതന്ത്ര സ്ഥാനാർത്ഥിയായി പത്തനംതിട്ടയിൽ നിന്നു വിജയിച്ച കെ. കെ. നായർ ഒരു പ്രത്യേക രാഷ്‌ട്രീയ സാഹചര്യത്തിൽ കെ കരുണാകരനെ രാഷ്ട്രീയമായി സഹായിച്ചതിന് പ്രത്യുപകാരമായായിരുന്നു ആ ചിരകാല ആവശ്യം സാധ്യമായത്.

ഏറ്റവും ശുദ്ധ വായു ലഭിക്കുന്ന ജില്ല, ജനസംഖ്യാ വർധനവിന്റെ കാര്യത്തിൽ പിന്നോട്ടു പോകുന്ന ഏക ജില്ല, കേരളത്തിന്റെ ഊർജ മേഖലയിലേക്ക് മൂന്നിലൊന്നും സംഭാവന ചെയ്യുന്ന ജില്ല, വിസ്തൃതിയുടെ ഏതാണ്ട് പകുതിയിലേറെയും വാനപ്രദേശമായ ജില്ല ഇങ്ങനെ നിരവധി പ്രത്യേകതകൾ പത്തനംതിട്ടയ്ക്കുണ്ട്. സാമുദായികമായി നോക്കിയാൽ നായർ, ഈഴവ, ദളിത്, വിശ്വകർമ, ഓർത്തഡോക്സ്, മാർത്തോമാ, മലങ്കര കാത്തോലിക്, സി എസ് ഐ എന്നീ വിഭാഗങ്ങളും നിരവധി പെന്തക്കോസ്റ്റൽ സഭകളും ചെറുതല്ലാത്ത സ്വാധീനം ചെലുത്തുന്ന പ്രദേശം. ശബരിമല മുതൽ പരുമല വരെയും മഞ്ഞനിക്കര മുതൽ മണ്ണടി വരെയും വിഖ്യാതമായ ഇടങ്ങൾ. ആറന്മുളയും നിരണവും ഉൾപ്പെടെ കേരളത്തിൽ മുദ്ര പതിപ്പിച്ച ഇടങ്ങൾ.