സെക്രട്ടേറിയറ്റ് ജീവനക്കാർക്ക് ഇനി വൈകിയാൽ ശരിക്കും പണി കിട്ടും; ശമ്പളം പഞ്ചിങുമായി ബന്ധിപ്പിച്ചു

തിരുവനന്തപുരം: പഞ്ചിങ് നടപ്പാക്കിയിട്ടും വൈകി വരുന്ന സെക്രട്ടേറിയറ്റിലെ ജീവനക്കാരുടെ ശീലത്തിന് മാറ്റമില്ലായിരുന്നു. എന്നാൽ അവരെ ശരിക്കും വെട്ടിലാക്കി സർക്കാർ. ശമ്പളം പഞ്ചിങ്ങുമായി ബന്ധപ്പെടുത്തി പൊതുഭരണവകുപ്പ് ഉത്തരവിറക്കി. ഒക്ടോബർ മാസം മുതൽ പൊതുഭരണം, നിയമം, ധനകാര്യം തുടങ്ങിയ വകുപ്പുകളിലെ ജീവനക്കാർക്കാണ് പുതിയ സംവിധാനം ബാധകമാക്കുന്നത്. ഇതോടെ ഇനി വൈകിയെത്തിയാൽ അതിന് ആനുപാതികമായി ശമ്പളത്തിൽ കുറവുണ്ടാകും. താമസിച്ചുവരുന്നവർക്കും, നേരത്തെ പോകുന്നവർക്കും ശമ്പളം കുറയും. നേരത്തെ പഞ്ചിങ് ഏർപ്പെടുത്തിയിരുന്നെങ്കിലും വൈകിവരുന്ന ജീവനക്കാർ മേലുദ്യോഗസ്ഥരുടെ അനുമതിയോടെ ഹാജർ ക്രമീകരിക്കുകയാണ് ചെയ്തുവന്നിരുന്നത്. എന്നാൽ ശമ്പളവുമായി പഞ്ചിങ് ബന്ധിപ്പിച്ചതോടെ ഇനിമുതൽ ഹാജർ ക്രമീകരണത്തിൽ ഒന്നും ചെയ്യാനാകില്ലെന്നാണ് പൊതുഭരണവകുപ്പ് വൃത്തങ്ങൾ പറയുന്നത്.