കനകക്കുന്നിൽ ഇനി പെൺകരുത്തിൻ്റെ നാളുകൾ; 'എസ്കലേറ 2026' വനിതാ ഫെസ്റ്റിന് വർണ്ണാഭമായ തുടക്കം

'കരുത്താർന്ന പെൺചുവടുകൾ കരുതലോടെ കേരളം മുന്നോട്ട്' എന്ന സന്ദേശവുമായാണ് ഫെബ്രുവരി 9 വരെ നീണ്ടുനിൽക്കുന്ന ഈ പരിപാടികൾ അരങ്ങേറുന്നത്. വനിതാ സംരംഭകർക്ക് ആത്മവിശ്വാസവും പുതിയ വിപണന സാധ്യതകളും ഒരുക്കുക എന്ന ലക്ഷ്യത്തോടെയാണ് ഈ മേള സംഘടിപ്പിച്ചിരിക്കുന്നത്. കനകക്കുന്ന് കൊട്ടാര മൈതാനത്തും നിശാഗന്ധി ഓഡിറ്റോറിയത്തിലുമായി നടക്കുന്ന മേളയിൽ ഇതര സംസ്ഥാനങ്ങളിൽ നിന്നുള്ളവ ഉൾപ്പെടെ 140-ഓളം വിപണന സ്റ്റാളുകൾ ഒരുക്കിയിട്ടുണ്ട്.

ഇതിന് പുറമെ ട്രാൻസ്‌ജെൻഡർ സംരംഭകരടക്കം ഇരുന്നൂറിലധികം വനിതാ സംരംഭകരുടെ ഉൽപ്പന്നങ്ങളും ഇവിടെ പ്രദർശിപ്പിക്കുന്നുണ്ട്. ഫെബ്രുവരി 6, 7 തീയതികളിൽ നിശാഗന്ധിയിൽ നടക്കുന്ന വനിതാ കോൺക്ലേവിൽ ദേശീയ-അന്തർദേശീയ തലത്തിലുള്ള വിദഗ്ധർ പങ്കെടുക്കും. സംരംഭകത്വ പരിശീലനം, സെമിനാറുകൾ, ബോധവൽക്കരണ ക്ലാസുകൾ എന്നിവയ്‌ക്കൊപ്പം എല്ലാ വൈകുന്നേരങ്ങളിലും പ്രമുഖ കലാകാരന്മാർ അണിനിരക്കുന്ന സാംസ്കാരിക പരിപാടികളും മേളയ്ക്ക് മാറ്റുകൂട്ടും. വനിതാ ശിശു വികസന മേഖലയിലെ മികച്ച പ്രവർത്തനങ്ങൾക്കുള്ള ഐ.സി.ഡി.എസ്. അവാർഡുകളും ചടങ്ങിൽ വിതരണം ചെയ്തു. സ്ത്രീ ശാക്തീകരണത്തിൻ്റെ പുതിയ അധ്യായമായി മാറുന്ന എസ്കലേറ വുമൺ ഫെസ്റ്റ് വരും ദിവസങ്ങളിൽ നഗരത്തിന് കൂടുതൽ ഊർജ്ജം പകരുമെന്നുറപ്പാണ്.