നെയ്യാർ വനത്തിലെ ഊരുകൾക്ക് ആശ്വാസമായി കുമ്പിച്ചൽകടവ് പാലം യാഥാർത്ഥ്യമായി

കേരളത്തിലെ ഏറ്റവും വലിയ മൾട്ടി-സ്പാൻ പാലങ്ങളിൽ ഒന്നായ കുമ്പിച്ചൽകടവ് പാലം, പ്രകൃതിരമണീയമായ കരിപ്പയാറിൻ്റെയും അഗസ്ത്യാർക്കൂടം മലനിരകളുടെയും മനോഹര ദൃശ്യങ്ങൾക്ക് സാക്ഷിയായി നിലകൊള്ളുന്നു. സോഷ്യൽ മീഡിയയിൽ തരംഗമായി മാറുകയാണ് കുമ്പിച്ചാൽ കടവ് പാലവുമായി ബന്ധപ്പെട്ട റീലുകൾ. നെയ്യാർ വനത്തിനുള്ളിലെ ആദിവാസികളെ അമ്പൂരിയുമായി ബന്ധിപ്പിക്കുന്ന ഈ പാലം, അവരുടെ ദൈനംദിന ജീവിതത്തിന് ഒരുപാട് ആശ്വാസമാകും. ചികിത്സ, വിദ്യാഭ്യാസം, മറ്റു ആവശ്യങ്ങൾ എന്നിവയ്ക്കായി കിലോമീറ്ററുകൾ താണ്ടി പോകേണ്ട ദുരിതത്തിന് ഇതോടെ വിരാമമാകും.

കിഫ്ബി (KIIFB) ഫണ്ട് ഉപയോഗിച്ച് സർക്കാർ കേരള റോഡ് ഫണ്ട് ബോർഡ് (KRFB) മുഖേനയാണ് ഈ ബൃഹദ് പദ്ധതി നടപ്പാക്കിയത്. പ്രകൃതി സൗന്ദര്യത്തിന് കോട്ടം തട്ടാതെ, ജനങ്ങളുടെ അടിസ്ഥാനപരമായ ആവശ്യം നിറവേറ്റിയ ഈ പാലം, മനുഷ്യബന്ധങ്ങളുടെ പുതിയ വഴിയാണ് തുറന്നിടുന്നത്. വനത്തിനുള്ളിലെ ഊരുകൾക്ക് ഇനി പുറംലോകത്തേക്ക് എളുപ്പത്തിൽ എത്താം. വികസനത്തിൻ്റെ വെളിച്ചം വന്യജീവി സങ്കേതത്തിലെ ഈ ഉൾപ്രദേശങ്ങളിലേക്കും എത്താൻ കുമ്പിച്ചൽകടവ് പാലം ഒരു നാഴികക്കല്ലാവുമെന്നതിൽ സംശയമില്ല.