Onam 2021| ചിങ്ങം പിറക്കാതെ ഇന്ന് അത്തം; നിയന്ത്രണങ്ങൾക്കും ദുരിതങ്ങൾക്കുമിടയിൽ മലയാളികൾ ഓണത്തിരക്കിലേക്ക്

എന്നാൽ, സംശയം വേണ്ട. അത്തം ഓഗസ്റ്റ് 12ന് വ്യാഴാഴ്ച തന്നെ. കേരളത്തിലെ ഓണാഘോഷത്തിനു തുടക്കം കുറിക്കുന്ന തൃപ്പൂണിത്തുറ അത്തച്ചമയവും ഇന്ന് തന്നെയാണ്. കലണ്ടറുകളിൽ 12ന് ഉത്രം നക്ഷത്രം ആണെന്നു കാണും. അത്തം എന്നെഴുതിക്കാണുന്നത് 13 ന്റെ കള്ളിയിലാണ്. പക്ഷേ ഇന്ന് രാവിലെ 8 മണി 54 മിനിറ്റ് വരെ മാത്രമേ ഉത്രം നക്ഷത്രം ഉള്ളൂ. അതു കഴിഞ്ഞാൽ അത്തമായി.

13ന് രാവിലെ 8 മണി 01 മിനിറ്റ് വരെ അത്തം നക്ഷത്രമാണ്. അതായത്, 13ന് പിറന്നാൾ പക്ഷത്തിൽ ആവശ്യമായ അത്രയും നേരം അത്തം നക്ഷത്രം ഇല്ല. അതുകൊണ്ട് അത്തം വരുന്നത് ഓഗസ്റ്റ് 12ന് തന്നെ. അത്തപ്പൂക്കളം ഇട്ടുതുടങ്ങേണ്ടതും 12ന് തന്നെ.

ആളും ആരവവുമില്ലാതെ തൃപ്പൂണിത്തുറ അത്തച്ചമയത്തിന് ഇന്ന് കൊടിയേറും. കോവിഡ് കാലമായതിനാൽ ആഘോഷം ചടങ്ങുകളിൽ മാത്രമാകും. പ്രളയവും കോവിഡും തീർത്ത കെടുതികൾക്കിടെ കഴിഞ്ഞ നാലുവർഷമായി അത്തച്ചമയത്തിന് കാര്യമായ ആഘോഷങ്ങളില്ല. ഇത്തവണയും ഇതുതന്നെയാണ് സ്ഥിതി.

അത്തം നഗറിൽ ഉയർത്താനുളള പതാക രാജകുടുംബത്തിന്‍റെ പ്രതിനിധിയായ നി‍ർമല തമ്പുരാനിൽ നിന്ന് തൃപ്പൂണിത്തുറ നഗരസഭാധ്യക്ഷ ഏറ്റുവാങ്ങി. രാജ കുടുംബത്തിന്‍റെ പ്രതിനിധിയായി ഒരു സ്ത്രീ അത്തം പതാക കൈമാറുന്നത് ഇതാദ്യമായിട്ടാണ്

ഇന്ന് രാവിലെ പത്തിന് തൃപ്പൂണിത്തുറ ബോയ്സ് ഹൈസ്കൂൾ ഗ്രൗണ്ടിൽ മന്ത്രി പി രാജീവ് പതാക ഉയർത്തും. കോവിഡ് കാലമായതിനാൽ കഥംകളി, ഓട്ടം തുള്ളൽ അടക്കമുളള മത്സരങ്ങൾ ഓൺലൈനായി നടത്തും. പണ്ടുകാലത്ത് കൊച്ചി രാജാക്കൻമാർ പ്രജകളെ കാണാൻ അത്തം നാളിൽ നടത്തിയിരുന്ന ഘോഷയാത്രയാണ് തൃപ്പൂണിത്തുറ അത്തച്ചമയമായി മാറിയത്.

കോവിഡ് ജാഗ്രതയുടെ നിയന്ത്രണങ്ങള്‍ക്കിടയിലെത്തുന്ന രണ്ടാമത്തെ ഓണക്കാലമാണിത്. പുത്തനുടുപ്പുകളും പൂപ്പൊലിമയും ഉത്സവാന്തരീക്ഷവും സദ്യവട്ടങ്ങളും ഒക്കെ നിറയുന്ന ഓണക്കാലത്തില്‍നിന്ന് ഏറെ വ്യത്യസ്തം. ഓണത്തിരക്കില്‍ രോഗവ്യാപനമുണ്ടാവാതിരിക്കാനുള്ള ജാഗ്രത കൈവെടിയരുതെന്ന മുന്നറിയിപ്പാണ് അധികൃതർ നൽകുന്നത്. ഓണ വിപണിയുടെ ഉന്മേഷത്തില്‍ ഒരു വര്‍ഷത്തെ ജീവിതം പൊലിപ്പിക്കാന്‍ കാത്തിരുന്നവര്‍ക്ക് ഇക്കുറിയും നിരാശയാണ് ബാക്കി. കടകൾ തുറന്നെങ്കിലും നിയന്ത്രണങ്ങളും ലോക്ക്ഡൗൺ കാലത്ത് പലരുടെയും വരുമാനം നിലച്ചതും ഓണപ്പൊലിമ കുറച്ചേക്കും. എങ്കിലും മലയാളികളുടെ മനസ്സിലും ഓർമകളിലും ഇത് ആഘോഷ കാലമാണ്.