ഇനിയെന്നു പോകാൻ കഴിയും? ഉംറ മുടങ്ങിയവരുടെ ആശങ്ക

ആശിച്ച് മോഹിച്ച് പ്രാർത്ഥിച്ച്  ചെയ്യാൻ ഒരുങ്ങിയ ഉംറ മുടങ്ങിയതിന്റെ വിഷമത്തിലാണ് മലപ്പുറം വേങ്ങര കൊളപ്പുറം സ്വദേശി കദീജുമ്മ. ഒപ്പം ഉളളവർ ഉംറക്ക് പോകുന്നു എന്ന് കേട്ടപ്പോൾ തോന്നിയ ആഗ്രഹം. 70,000 രൂപയോളം വേണം. വേറെ വഴി മുൻപിൽ ഇല്ല, സ്വർണം വിൽക്കാൻ തീരുമാനിച്ചു. കാതിലെ ചുറ്റും വളയും എല്ലാം ഊരി വിറ്റാണ് അറുപത്തഞ്ചുകാരിയായ കദീജുമ്മ പണം കണ്ടെത്തിയത്. എല്ലാം ഉദ്ദേശിച്ച പോലെ തന്നെ നടന്നു, വിമാനത്താവളം വരെ. കൊറോണ കാരണം സൗദി അറേബ്യ ഉംറയ്‌ക്കായി ആരെയും അവിടേക്ക് കയറാൻ അനുവദിക്കുന്നില്ല എന്നും ഇപ്പൊൾ പോകാൻ പറ്റില്ല എന്നും ഒപ്പമുളളവർ പറഞ്ഞപ്പോൾ നെഞ്ച് തകർന്നു പോയി എന്ന് കദീജുമ്മ.