ഒറ്റപ്പെടുന്നവരേ, നിങ്ങൾ ഒറ്റയ്ക്കല്ല, പരിഹാരം കണ്ടെത്താൻ ലോകാരോ​ഗ്യ സംഘടന; കമ്മീഷൻ തലപ്പത്ത് വിവേക് മൂർത്തി

ഏകാന്തത ഗുരുതരമായ ആഗോള ആരോഗ്യ ഭീഷണിയാണെന്ന് ലോകാരോഗ്യ സംഘടന (ഡബ്ല്യുഎച്ച്ഒ). ഈ പ്രശ്നം പരിഹരിക്കാനും നടപടികൾ സ്വീകരിക്കാനും ലോകാരോഗ്യ സംഘടന പുതിയ കമ്മീഷന് രൂപം നൽകി. യുഎസ് സർജൻ ജനറൽ ഡോ വിവേക് ​​മൂർത്തിയും ആഫ്രിക്കൻ യൂണിയൻ കമ്മീഷനിലെ യുവ പ്രതിനിധി ചിഡോ എംപെംബയുമാണ് കമ്മീഷന് നേതൃത്വം നൽകുന്നത്. സാമൂഹികമായ ഒറ്റപ്പെടലുമായി ബന്ധപ്പെട്ട ആരോഗ്യപ്രശ്‌നങ്ങളും അതിനുള്ള ഫലപ്രദമായ പരിഹാരങ്ങളും കണ്ടെത്താനും നടപ്പിലാക്കാനും കമ്മീഷൻ പ്രവർത്തിക്കും. ഒറ്റപ്പെടല്‍ ഗുരുതരമായ പ്രശ്നമാണെന്നും ഇതൊരു പകർച്ചവ്യാധിക്കു സമാനമാണെന്നും ഈ പ്രശ്നത്തെ നേരിടാനുള്ള ആദ്യത്തെ ആഗോള സംരംഭമാണിതെന്നും ഡബ്ല്യുഎച്ച്ഒ ഡയറക്ടർ ജനറൽ ടെഡ്രോസ് അദാനോം ഗെബ്രിയേസസ് പറഞ്ഞു. വിവേക് മൂർത്തിക്കും എംപെംബക്കുമൊപ്പം മറ്റ് പ്രമുഖരും കമ്മീഷനിൽ പ്രവർത്തിക്കും.