World Rainforests Day | ജൈവവൈവിധ്യത്തിന്റെ കലവറ; ആവാസ വ്യവസ്ഥയുടെ അവിഭാജ്യ ഘടകം; ഇന്ന് മഴക്കാടുകൾക്കായുള്ള ദിനം

ഇപ്പോഴാണ് ആ സമയം (The Time is Now) എന്നതാണ് ഈ വർഷത്തെ മഴക്കാടുകൾക്കായുള്ള ദിവസത്തിന്റെ തീം. ഭൂമിയിലെ ജീവന്റെ നിലനിൽപിന് മഴക്കാടുകൾക്ക് എത്രത്തോളം പ്രാധാന്യമുണ്ടെന്ന് ജനങ്ങളെ ബോധവൽക്കരിക്കുക എന്നതാണ് ഈ ദിവസത്തിന്റെ ലക്ഷ്യം. അതിവേ​ഗത്തിലുള്ള നഗരവൽക്കരണവും (urbanisation) മനുഷ്യരുടെ അമിത ചൂഷണവും മൂലം, വനങ്ങൾ ഓരോ വർഷവും നശിച്ചു കൊണ്ടിരിക്കുകയാണ്. വനങ്ങളെയും അവയിൽ വസിക്കുന്ന വൈവിധ്യമാർന്ന ജീവജാലങ്ങളെയും സംരക്ഷിക്കാൻ മതിയായ നടപടികളും മുൻകരുതലുകളും സ്വീകരിക്കണമെന്നും അത് നീട്ടിവെയ്ക്കരുതെന്നും ഈ വർഷത്തെ തീം അടിവരയിട്ടു പറയുന്നു.

മഴക്കാടുകളെ സംരക്ഷിക്കുന്നതിനായി പ്രവർത്തിക്കുന്ന റെയിൻ ഫോറസ്റ്റ് പാർട്ണർഷിപ്പ് (Rainforest Partnership) എന്ന സ്ഥാപനമാണ് 2017-ൽ മഴക്കാടുകൾക്കായുള്ള ദിനം ആദ്യമായി ആഘോഷിച്ചത്. കാലാവസ്ഥാ വ്യതിയാനത്തെ (climate change) ഏറ്റവും ശക്തമായി ചെറുക്കാൻ സഹായിക്കുന്നവയാണ് മഴക്കാടുകൾ. മഴക്കാടുകളെ സംരക്ഷിക്കുന്നതിനും അവയെ പുനഃസ്ഥാപിക്കുന്നതിനുമുള്ള ഒരു ആഗോള മുന്നേറ്റത്തിനു തന്നെ തുടക്കമിടാൻ ആ ദിവസം ആചരിച്ചതിലൂടെ സാധിച്ചു.

കാപ്പി, സുഗന്ധവ്യഞ്ജനങ്ങൾ, പച്ചക്കറികൾ, പഴങ്ങൾ എന്നിവക്കായും പാം ഓയിൽ പോലുള്ള മറ്റ് ഉൽപന്നങ്ങൾക്കായും നാം മഴക്കാടുകളെ ആശ്രയിക്കാറുണ്ട്. സമൃദ്ധമായ സസ്യജാലങ്ങളുടെ ആവാസ വ്യവസ്ഥ കൂടിയാണ് ഈ വനങ്ങൾ. ചിലതൊക്കെ പല തരം ചികിത്സകൾക്കും മരുന്നുകൾക്കുമായും ഉപയോഗിക്കുന്നതുമാണ്.