ബ്രിട്ടീഷ് എയർവേയ്‌സിന് 9 കോടി രൂപ പിഴ; 'കോവിഡ് കാലത്ത് യാത്രക്കാർക്ക് യഥാസമയം റീഫണ്ട് നൽകിയില്ല'

കോവിഡ് -19 മഹാമാരി സമയത്ത് റദ്ദാക്കിയ വിമാനങ്ങളുടെ ടിക്കറ്റ് ചാർജ്ജ് റീഫണ്ട് ചെയ്യുന്നതിൽ കാലതാമസം വരുത്തിയതിന് ബ്രിട്ടീഷ് എയർവേയ്‌സിന് അമേരിക്ക 1.1 മില്യൺ ഡോളർ (ഏകദേശം 9 കോടി രൂപ) പിഴ ചുമത്തി. അമേരിക്കയിലേക്കും അവിടെ നിന്ന് പുറത്തേക്കുമുള്ള റദ്ദാക്കിയ ഫ്ലൈറ്റുകൾക്ക് എയർലൈൻ കൃത്യസമയത്ത് റീഫണ്ട് നൽകാത്തതിനെ തുടർന്നാണ് പിഴ ചുമത്തിയതെന്ന് യുഎസ് ഗതാഗത വകുപ്പ് അറിയിച്ചു. വിമാനക്കമ്പനിക്കെതിരെ 1200ലധികം പരാതികൾ ലഭിച്ചതായി ഗതാഗത വകുപ്പ് അറിയിച്ചു. ബ്രിട്ടീഷ് എയർലൈനും മറ്റ് എയർലൈനുകളും ഭാവിയിൽ നടത്താനിടയുള്ള സമാനമായ നിയമവിരുദ്ധ നടപടികൾക്ക് ശക്തമായ താക്കീതാണ് ഈ പിഴ എന്നും യുഎസ് ഗതാഗത വകുപ്പ് കൂട്ടിച്ചേർത്തു.