വിസ്താരയ്ക്ക് അമേരിക്കയിലേക്ക് വിമാന സർവീസുകൾ നടത്താൻ അനുമതി; കോവിഡ് കാരണം സർവ്വീസുകൾ വൈകിയേക്കും

യുണൈറ്റഡ് സ്റ്റേറ്റ്സ് ഡിപ്പാർട്ട്മെന്റ് ഓഫ് ട്രാൻസ്‌പോർട്ടേഷൻ, ട്രാൻസ്‌പോർട്ടേഷൻ സെക്യൂരിറ്റി അഡ്മിനിസ്ട്രേഷൻ, ഫെഡറൽ ഏവിയേഷൻ അഡ്മിനിസ്ട്രേഷൻ എന്നിവ നിഷ്കർഷിക്കുന്ന ചട്ടങ്ങൾ പാലിക്കുന്നിടത്തോളം വിസ്താരയ്ക്ക് ഇന്ത്യയ്ക്കും അമേരിക്കയ്ക്കും ഇടയിൽ അന്താരാഷ്ട്ര കാരിയർ സേവനങ്ങൾ നടത്താൻ കഴിയും. പാസഞ്ചർ സേവനങ്ങൾ, റീഫണ്ട്, സുരക്ഷാ മാർഗനിർദ്ദേശങ്ങൾ എന്നിവയുമായി ബന്ധപ്പെട്ട നിയന്ത്രണങ്ങൾ ഇതിൽ ഉൾപ്പെടും. ഏപ്രിൽ അവസാനമാണ് യു എസിലേക്ക് വിമാന സർവീസുകൾ നടത്താനുള്ള അപേക്ഷ വിസ്താര നൽകിയത്. താൽക്കാലിക അനുമതി ജൂണിൽ നൽകിയിരുന്നു.

കോവിഡ് വ്യാപനത്തിന്റെ പശ്ചാത്തലത്തിൽ ഇന്ത്യയിൽ നിന്ന് യാത്ര ചെയ്യുന്നവർക്ക് അമേരിക്ക യാത്രാവിലക്ക് ഏർപ്പെടുത്തിയിരിക്കുകയാണ്. യു എസ് പൗരന്മാർ, അവരുടെ കുടുംബാംഗങ്ങൾ, വിദ്യാർത്ഥികൾ, സ്ഥിരതാമസത്തിന് നിയമപരമായ അവകാശമുള്ളവർ എന്നിവർക്ക് ഇളവ് നൽകിയിട്ടുണ്ട്. ദീർഘദൂര സർവീസുകൾ വിസ്താര ഇപ്പോൾ ആരംഭിക്കാൻ സാധ്യതയില്ല. ഇന്ത്യയിലേക്കുള്ള യാത്രയിലും നിയന്ത്രണങ്ങൾ നിലവിലുണ്ട്. ഏതാനും ചില ഇളവുകൾ ഒഴിച്ചാൽ ഇന്ത്യൻ പൗരന്മാർ അല്ലാത്തവർക്ക് ഇന്ത്യയിലേക്ക് പ്രവേശിക്കുക അത്ര എളുപ്പമല്ല.